24.11.2024 | 21:56
Միակն ու անկրկնելին. ՀՀ-ում Ֆրանսիայի դեսպանի արձագանքը՝ Ադրբեջանի տարածքային պահանջներին
Մաքրվել է Գավառագետի հունի Հացառատ թաղամասի հատվածը
07.06.2024 | 13:45
Գեղարքունիքի մարզի Գավառ համայնքում ավարտին են մոտենում Հացառատ թաղամասով հոսող Գավառագետի հունի մի հատվածի մաքրման աշխատանքները։
Ինչպես տեղեկանում ենք Գավառի համայնքապետարանի աշխատակազմից, մաքրման աշխատանքներն իրականացնում է «Թիվ 28 ՇՄՇ» ԲԲԸ-ն։
Գավառագետի հունի մաքրման նպատակով Գավառ համայնքի 2024 թվականի բյուջեից հատկացվել է 2 մլն 880 հազար դրամ։ Կատարված աշխատանքների արդյունքում տիղմից, ջրիմուռներից, կենցաղային աղբի թափոններից մաքրվել է շուրջ 650 մ երկարության հատված։
Մաքրման աշխատանքների արդյունքում Գավառագետին մերձակա բնակարանների նկուղները և տնամերձերն ազատվել են բարձրացող ջրից, խոնավությունից, ճահճահոտից։
«Հացառատ թաղամասի բնակչության համար չափազանց կարևոր խնդիր լուծվեց, քանի որ գարնանային վարարումների հետևանքով բարձրացած Գավառագետի ջրերը ողողել էին շրջակա տնամերձերը և բնակարանների նկուղները։ Արվել է հնարավորը, որպեսզի 650 մետր երկարության հատվածում ջրի հոսքը խոչընդոտող տիղմը և ջրիմուռներն ամբողջությամբ հեռացվեն։ Բնակիչները փաստում են, որ կատարված աշխատանքների շնորհիվ գետի հունն իջել է մոտ կես մետրով, իրենց տնամերձերը լիովին չորացել են, նկուղները՝ նույնպես, իսկ իրենք արդեն ձեռնարկում են տնամերձ հողամասերի մշակման աշխատանքները»,-նշեցին Գավառի համայնքապետարանի աշխատակազմից։
