08.12.2025 | 13:28
Ինչո՞ւ չպետք է դրոշ լինի եկեղեցում. դեմ չեմ կառավարության նիստերը աղոթքով սկսելուն. Սրբուհի Գալյան․ ՏԵՍԱՆՅՈՒԹ
Հունգարիայի ԱԳ նախարարը հաստատել է, որ Բուդապեշտը խոչընդոտում է ԵՄ Խաղաղության հիմնադրամից Հայաստանին աջակցության տրամադրմանը
Քաղաքականություն
05.06.2024 | 15:14
Հունգարիան ողջունում է Ադրբեջանի և Հայաստանի միջև հարաբերությունների կարգավորման գործում առաջընթացը։ Ադրբեջանական լրատվամիջոցների հաղորդմամբ՝ այս մասին հայտարարել է Հունգարիայի արտգործնախարար Պետեր Սիյարտոն Բաքվում Ադրբեջանի ԱԳ նախարար Ջեյհուն Բայրամովի հետ համատեղ մամուլի ասուլիսի ժամանակ։
«Մենք ուրախ ենք, որ Ադրբեջանն ու Հայաստանը ձեռնարկել են ավելի լուրջ քայլեր։ Ցանկանում ենք, որ տարածաշրջանում խաղաղություն ու կայունություն լինի, երկու ժողովուրդներն արժանի են ապրել խաղաղության մեջ։ Հունգարիան ԵՄ-ում իր նախագահության ընթացքում կշարունակի աջակցել այս տարածաշրջանում խաղաղության բոլոր նախաձեռնություններին»,-ասել է Սիյարտոն։
Նա, ըստ էության, հասաստել է, որ Հունգարիան խոչընդոտում է ԵՄ Խաղաղության հիմնադրամից Հայաստանին աջակցություն տրամադրելուն՝ հայտարարելով, թե Հունգարիան հետևելու է, որ ԵՄ-ն Հարավային Կովկասի տարածաշրջանում հավասարակշռված քաղաքականություն վարի և «կրակի վրա յուղ չլցնի»։
«Մենք կարծում ենք, որ եթե ԵՄ-ն ցանկանում է 10 միլիոն եվրո հատկացնել Հայաստանին ականազերծման համար, ապա նույն ծավալի օգնություն պետք է հատկացվի Ադրբեջանին։ Մենք պետք է աջակցենք խաղաղության գործընթացին, ոչ թե խանգարենք»,- հայտարարել է Հունգարիայի ԱԳ նախարարը։
Հիշեցնենք, որ ապրիլին «Ազատություն» ռադիոկայանի դիվանագիտական աղբյուրները հայտնել էին, որ Հունգարիան արգելափակում է Եվրամիության Խաղաղության հիմնադրամից Հայաստանին աջակցություն տրամադրելու նախագիծը։ Աղբյուրները նշել էին, որ Հունգարիան պահանջում է, որ Ադրբեջանը ևս ներառվի ծրագրում, ինչը քննարկման սեղանին է՝ փակուղուց դուրս գալու համար։
Ավելի վաղ էլ հաղորդվել էր, որ Բրյուսելում նախնական համաձայնություն է ձեռք բերվել ԵՄ Խաղաղության հիմնադրամից Հայաստանին 10 միլիոն եվրոյի օգնություն տրամադրելու շուրջ։ Ըստ դիվանագիտական փաստաթղթերի՝ այդ գումարով պետք է մեկ գումարտակի համար նախատեսված դաշտային մոդուլային ճամբար ստեղծվեր, որը պետք է ներառեր նաև մեկ բժշկական օգնության ամբուլատորիա, ինչպես նաև համապատասխան ծառայություններ ու կարողություններ։
Էմմա Չոբանյան
