22.07.2026 | 10:58
Առողջության համընդհանուր ապահովագրության հիմնադրամի գործունեության արդյունքների ամփոփումը. ՈՒՂԻՂ
Դատարանն արդարացրեց Սերժ Սարգսյանին, Բարսեղ Բեգլարյանին և Գևորգ Հարությունյանին
Հասարակություն
31.05.2024 | 16:26
Երևանի ընդհանուր իրավասության դատարանը՝ նախագահությամբ դատավոր Վահե Միսակյանի, քիչ առաջ հրապարակել է դատավճիռ՝ արդարացնելով Հայաստանի երրորդ նախագահ Սերժ Սարգսյանին, «Ֆլեշ» ընկերության սեփականատեր Բարսեղ Բեգլարյանին և նախկին գյուղատնտեսության նախարարության աշխատակից Գևորգ Հարությունյանին։
Այս մասին տեղեկությունը Factor TV-ին փոխանցեցին դատարանի աշխատակազմից։
Սերժ Սարգսյանը, «Ֆլեշ» ընկերության սեփականատեր Բարսեղ Բեգլարյանը և նախկին Գյուղատնտեսության նախարարության բուսաբուծության վարչության պետ Գևորգ Հարությունյանը մեղադրվում էին պետությունից առանձնապես խոշոր չափի յուրացում կատարելու մեջ։ Դատախազությունը պահանջել էր Սերժ Սարգսյանին, Բարսեղ Բեգլարյանին և Գևորգ Հարությունյանի մեղավոր ճանաչել, բայց ազատել պատասխանատվությունից, քանի որ անցել է նրանց վերագրվող արարքի վաղեմության ժամկետը։ Պաշտպանական կողմն էլ պահանջել էր ճանաչել և հռչակել Սարգսյանի, Հարությունյանի և Բեգլարյանի անմեղությունը, և, փաստացի, դատավորը ճանաչեց և հռչակեց նրանց անմեղությունը։
Դատարանը դատավճիռը պետք է հրապարակեր մայիսի 29-ին, սակայն այս օրը դատական ակտը չէր հրապարակվել։
Դատական նիստից հետո Սերժ Սարգսյանը լրագրողների հետ զրույցում կարծիք հայտնեց, որ դատական ակտը Դատախազությունը կբողոքարկի։ Նշենք, որ բողոքարկման դեպքում հայցը քննելու է արդեն Հակակոռուպցիոն վերաքննիչ դատարանը։
Արաքս Մամուլյան
