18.12.2025 | 13:40
Ադրբեջանցի դատախազն առաջարկել է Ռուբեն Վարդանյանին դատապարտել ցմահ ազատազրկման
Փարաքար համայնքը նոր ղեկավար ունի
Քաղաքականություն
31.05.2024 | 13:04
Փարաքար համայնքի ավագանու քվեարկությամբ համայնքի ղեկավար է ընտրվել «Քաղաքացիական պայմանագիր» կուսակցության թեկնածու Լյուդվիգ Գյուլնազարյանը, այս մասին ֆեյսբուքի էջում հայտնել է Արմավիրի մարզպետ Դավիթ Խուդաթյանը։
«Գյուլնազարյանի գլխավորությամբ համայնքը կշարունակի զարգացման իր ճանապարհը և առաջիկա տարիներին միասին կենսական նշանակության բազմաթիվ խնդիրներ կլուծվեն»,- գրել է մարզպետը։
Հիշեցնենք, որ մայիսի 22-ին հրաժարականի դիմում էր ներկայացրել 2022 թվականի հունվարից Փարաքար համայնքի ղեկավարի պաշտոնը զբաղեցնող Դավիթ Մինասյանը։ Հրաժարականը կապված էր նրան անվստահություն հայտնելու գործընթացի հետ:
«Հայտարարում եմ, որ ավագանու «Դավիթ Մինասյան» խմբակցության արդեն նախկին անդամ Էմին Երիցյանը խախտել է քաղաքական պայմանավորվածությունը՝ միանալով Փարաքար համայնքի ղեկավարին անվստահություն հայտնելու գործընթացին: Իբրև հուսալի գործընկեր՝ ստեղծված իրավիճակի մասով կրում եմ քաղաքական պատասխանատվություն և հրաժարական եմ ներկայացնում Փարաքար համայնքի ղեկավարի պաշտոնից»,- գրել էր նա ֆեյսբուքյան էջում։
2021-ին ՏԻՄ ընտրությունների արդյունքներով Փարաքարի ավագանիում «Ապրելու Երկիր» կուսակցությունը ստացել էր 10 մանդատ, «Քաղաքացիական պայմանագիր» կուսակցությունը 6 մանդատ, իսկ «Դավիթ Մինասյան» դաշինքը՝ 5, սակայն համայնքի ղեկավար ընտրվեց ամենաքիչ ձայներ ստացած ուժի թեկնածուն։ Որպեսզի Դավիթ Մինասյանը դառնար համայնքի ղեկավար, ՔՊ-ն և «Դավիթ Մինասյան» դաշինքը պայմանավորվեցին, որ ընտրվելուց հետո առաջին 2,5 տարին ղեկավարելու է Մինասյանը, հաջորդ 2,5 տարին՝ ՔՊ-ի թեկնածուն։
Մանյա Պողոսյան
