07.12.2025 | 11:26
Նիկոլ Փաշինյանը Յոթ Վերքում է․ եկեղեցում են արքեպիսկոպոսներ Կճոյանն ու Միրզախանյանը, եպիսկոպոս Սարոյանը
Ինչ փուլում է ԵՄ երկրների հետ վիզաների ազատականացման հարցի քննարկումը․ ԱԳՆ-ի մեկնաբանությունը
Քաղաքականություն
31.05.2024 | 13:01
ՀՀ-ԵՄ մուտքի արտոնագրերի ազատականացման շուրջ երկխոսության մեկնարկի շուրջ հարցը շարունակում է մնալ ՀՀ-ԵՄ գործընկերության օրակարգի կարևորագույն կետերից մեկը։ Այն նախատեսված է Եվրամիության հետ 2017 թվականին կնքած ՀՀ-ԵՄ Համապարփակ և ընդլայնված գործունեության համաձայնագրով։
Այս մասին Factor.am-ի գրավոր հարցմանն ի պատասխան տեղեկացրել են ԱԳՆ-ից։
Արտաքին քաղաքական գերատեսչությունից միևնույն ժամանակ շեշտել են, որ ՀՀ-ԵՄ մուտքի արտոնագրերի ազատականացման շուրջ երկխոսության շուտափույթ մեկնարկի անհրաժեշտությունն ընդգծված կերպով ներառում է նաև ՀՀ-ԵՄ գործընկերությանը վերաբերող բոլոր փաստաթղթերում։
«Պետք է նշել, որ թեպետ Եվրոպական հանձնաժողովը բազմիցս հաստատել է, որ Հայաստանը պատրաստ է երկխոսության մեկնարկին, այդուհանդերձ, դեռևս կան որոշ նախապայմաններ՝ կենսաչափական անձնագրերի համակարգի ներդրում, ընդհանուր բժշկական ապահովագրություն, սահմանային վերահսկման ընթացակարգեր և այլն, որոնք կարևոր են մուտքի արտոնագրերի ազատականացման շուրջ երկխոսության համար»,- նշված է ԱԳՆ-ի պատասխանում։
Արտգործնախարարությունից նաև հայտնել են, որ հայկական կողմը ԵՄ և ԵՄ անդամ պետությունների հետ շարունակում է ինտենսիվ աշխատանքներ տանել խնդրի առավել արդյունավետ և ժամանակին լուծումներ գտնելու համար։
Ի թիվս այլ հարցերի Factor.am-ն ԱԳՆ-ից հետաքրքրվել էր՝ ԵՄ-ի կողմից շենգենյան վիզաների վճարի չափի հնարավոր փոփոխությունն արդյո՞ք ազդելու է Հայաստանի վրա։
Արտաքին գերատեսչությունից արձագանքել են, որ ԵՄ-ի կողմից շենգենյան վիզաների վճարի չափի հնարավոր փոփոխությունը չի տարածվելու ՀՀ քաղաքացիների վրա։
«ՀՀ քաղաքացիների համար շենգենյան վիզաների վճարի չափը սահմանված է «Հայաստանի Հանրապետության և Եվրոպական միության միջև վիզաների տրամադրումը դյուրացնելու մասին» 2012 թ. դեկտեմբերի 17-ին կնքված համաձայնագրով: Համաձայն նշյալ համաձայնագրի՝ վիզայի դիմումների հետ կապված ձևակերպումների համար վճարը կազմում է 35 եվրո, իսկ եթե վիզայի տրամադրումն իրականացվում է արտաքին ծառայություն մատուցողի հետ (վիզա կենտրոններ), ապա տվյալ ծառայության վճարը չպետք է գերազանցի 30 եվրոն»,- մանրամասնել են արտգործնախարարությունից։
Մանյա Պողոսյան
