24.04.2026 | 23:32
Կապանում ջրանջատում կլինի
Մեծ Բրիտանիայի խորհրդարանը ցրվել է հուլիսի 4-ին կայանալիք ընտրություններին ընդառաջ
30.05.2024 | 14:41
Մեծ Բրիտանիայում խորհրդարանը պաշտոնապես ցրվել է՝ կապված առաջիկա արտահերթ ընտրությունների հետ, գրում է DW-ի ռուսական ծառայությունը։ Գործող օրենքի համաձայն՝ խորհրդարանը պետք է ցրվի համընդհանուր ընտրություններից 25 աշխատանքային օր առաջ։ Ընտրությունները վարչապետ Ռիշի Սունակի նախաձեռնությամբ տեղի են ունենալու հուլիսի 4-ին:
Վերլուծաբաններն ակնկալում էին, որ դրանք տեղի կունենան աշնանը, սակայն կառավարությունը համաձայնության եկավ ավելի վաղ ժամկետի շուրջ: Սունակը անցյալ շաբաթ հայտարարել էր, որ Մեծ Բրիտանիայի թագավոր Չարլզ III-ը բավարարել է խորհրդարանը ցրելու իր խնդրանքը։
Խորհրդարանի ցրումը նշանակում է, որ Համայնքների պալատի բոլոր 650 տեղերը թափուր են դառնում: Ընտրություններից հետո՝ հուլիսի 9-ին, խորհրդարանի նոր կազմը կհավաքվի պատգամավորների երդման արարողության և խոսնակ ընտրելու համար։
Նախորդ ընտրությունները տեղի էին ունեցել 2019 թ-ին։ Բորիս Ջոնսոնի գլխավորած Պահպանողական կուսակցությունը հաղթանակ էր տարել։ Սակայն հարցումները ցույց են տալիս Քեյր Սթարմերի գլխավորած Լեյբորիստական կուսակցության ժողովրդականության աճը։ Լեյբորիստները կարող են հաղթել 14 տարի ընդդիմություն լինելուց հետո:
