14.12.2025 | 16:37
Ֆիշինգը թիվ 1 կիբեռսպառնալիքն է այսօր․ Մխիթար Հայարապետյան
Լեհաստանի իշխանություններն արգելել են ռուս դիվանագետներին ազատ տեղաշարժվել երկրում
Քաղաքականություն
27.05.2024 | 19:06
Լեհաստանի արտաքին գործերի նախարար Ռադոսլավ Սիկորսկին հայտարարել է, որ ՌԴ դեսպանատան աշխատակիցների՝ երկրում ազատ տեղաշարժվելու իրավունքը սահմանափակված է։ Նրա խոսքով՝ ռուս դիվանագետները կարող են ազատ տեղաշարժվել միայն մայրաքաղաքի տարածքում՝ Մազովյան վոյեվոդության շրջանում։ Սահմանափակումները վերաբերում են Ռուսաստանի բոլոր ներկայացուցիչներին՝ բացառությամբ Լեհաստանում Ռուսաստանի դեսպան Սերգեյ Անդրեևի։
«Մյուս երկրները ևս ունեն նման կանոններ, և մենք հուսով ենք, որ մյուսները ևս կհետևեն մեր օրինակին»,- ասել է Սիկորսկին Բրյուսելում ԵՄ արտաքին հարաբերությունների խորհրդի նիստից հետո։
Լեհ պաշտոնյան հավելել է, որ Ռուսաստանի դեսպանատունը շուտով նոտա կստանա նոր սահմանափակումների ներդրման վերաբերյալ։
Սիկորսկիի խոսքով՝ սահմանափակումները մտցվում են «Եվրամիության և Լեհաստանի դեմ հիբրիդային պատերազմին» Ռուսաստանի մասնակցության հետ կապված։ Նրա պնդմամբ՝ Լեհաստանը Եվրոպայում դիվերսիաներին Ռուսաստանի մասնակցության ապացույցներ ունի։ Պաշտոնյան հույս է հայտնել, որ Ռուսաստանի կառավարությունը սահմանափակումները կընկալի որպես «շատ լուրջ նախազգուշական ազդանշան»։
Անցյալ շաբաթ Լեհաստանի վարչապետ Դոնալդ Տուսկը հայտարարել էր երկրում ինը մարդու ձերբակալության մասին, որոնք կասկածվում են սաբոտաժի և դիվերսիայի մեջ։ Ըստ Տուսկի՝ նրանք բոլորը գործել են Ռուսաստանի կառավարության հրահանգով։
