Վրաստանը պետք է հնարավորություն ունենա գնալ եվրոպական ճանապարհով, հակառակ դեպքում, գոհ կլինի միայն Պուտինը․ Բերբոք

Գերմանիայի ԱԳ նախարար Անալենա Բերբոքը հայտարարել է, որ Վրաստանը պետք է գնա եվրոպական ճանապարհով։

«Վրաստանը պետք է հնարավորություն ունենա գնալ եվրոպական ճանապարհով, հակառակ դեպքում, գոհ կլինի միայն Պուտինը: Վերջերս Վրաստանում էի և զրուցել եմ շատերի հետ, հատկապես՝ երիտասարդների, ուսանողների, ինչպես նաև կանանց, որոնք ամեն ինչ անելու են, որպեսզի Վրաստանը հնարավորություն ունենա միանալու ԵՄ-ին։ Ինձ համար աներևակայելի ցավալի է, որ Վրաստանի կառավարությունն արգելափակում է իր ժողովրդի այս մեծ երազանքը և, առաջին հերթին, երիտասարդների երազանքը Վրաստանի՝ Եվրամիությանն անդամակցելու մասին»,- ասել է Բերբոքը ԵՄ ԱԳ նախարարների խորհրդի նիստի մեկնարկից առաջ։

Նա ասել է, որ վիճահարույց օրենքի հետ կապված գործողություններով Վրաստանի իշխանությունը հակադրվում է սեփական բնակչությանը, որը նորից ու նորից դուրս է գալիս փողոց։ Այդպիսով, կառավարությունը դեմ է հանդես գալիս Վրաստանի եվրոպական հեռանկարին։

«Մենք, որպես ԵՄ անդամ երկրներ, վերահաստատել ենք վրացիներին իրենց եվրոպական հեռանկարը և մեկնել ենք մեր ձեռքը։ Բայց պարզ է, որ եվրոպական ճանապարհով կարելի է գնալ միայն այն դեպքում, եթե բնակչությունը ցանկանա գնալ այս ճանապարհով, բայց դրա համար անհրաժեշտ է նաև կառավարության ցանկությունը։ Վրաստանի նախագահն ասել է, որ ինքը չի կարող ստորագրել այս օրենքը, մարդիկ, որոնք դուրս են եկել փողոց, հստակ ասում են, որ այս օրենքը պետք է հետ կանչվի, ինչն ասում է նաև Եվրոպական խորհուրդը»,- նշել է Բերբոքը՝ հավելելով, որ բոլոր դերակատարները ցանկանում են հնարավորն անել, որ Վրաստանը գնա եվրոպական ճանապարհով։