25.11.2024 | 23:30
Էրդողանը ծրագրում է հաջորդ ժամկետով գրավել իշխանությունը․ TIME-ի անդրադարձը
Իտալիան հայտնել է թուրքական զինված խմբավորման անդամների ձերբակալելու մասին
Քաղաքականություն
22.05.2024 | 18:18
Իտալիայի ոստիկանությունը հայտնել է, որ խափանել է թուրքական հանցավոր խմբավորման գործունեությունը «ահաբեկչական նպատակներով»՝ կալանավորելով 19 մարդու, այդ թվում՝ խմբավորման բարձրաստիճան ղեկավարին, որը կապ ունի Թուրքիայում վերջերս տեղի ունեցած հարձակումների հետ, գրում է AFP-ն։
Ոստիկանության հաղորդագրության մեջ ասվում է, որ հարյուրավոր ոստիկաններ ձերբակալություններ են իրականացրել Իտալիայում, Շվեյցարիայում, Գերմանիայում և Թուրքիայում՝ թիրախավորելով ենթադրյալ հանցավոր դավադրությունը, որն «ուղղված է ահաբեկչական նպատակներով ասոցիացիա ստեղծելուն և ահաբեկչական հարձակումներ իրականացնելուն»:
Թուրքիայի ներքին գործերի նախարար Ալի Երլիքայան իր հերթին հայտարարել է, որ կալանավորվածներից 17-ը թուրքեր են, այդ թվում՝ 39-ամյա Բարիս Բոյունը, որը հայտնի է Թուրքիայում սպանությունների իրականացմանը մասնակցությամբ, նա հանցախմբի պարագլուխն է։
Իտալական ոստիկանությունը հաստատել է Բոյունի կալանավորումը։ Խումբը նաև կասկածվում է սպանության, թմրամիջոցների միջազգային ապօրինի շրջանառության և անօրինական ներգաղթին աջակցելու մեջ։ Ձերբակալվել են նաև երկու իտալացիներ։
Բոյունի խմբավորումը կապված է եղել Ստամբուլում ՏԻՄ ընտրություններից առաջ՝ փետրվարին տեղի ունեցած նախընտրական հանրահավաքի ժամանակ նախագահ Ռեջեփ Թայիփ Էրդողանի իշխող կուսակցության քաղաքապետի թեկնածուի դեմ զինված հարձակման հետ։
Մարտին Թուրքիան հայտարարել էր խմբավորման դեմ խոշոր գործողության մասին՝ երկրի հյուսիսարևմտյան Թեքիրդաղ նահանգում ձերբակալելով 13 կասկածյալի, որոնք կասկածվում էին սպանություններ և զինված հարձակումներ ծրագրելու մեջ։ Եվս ութ կասկածյալներ, որոնք, ենթադրաբար, այս խմբից են, ձերբակալվել են ապրիլին Իզմիրում։
Միլանի դատախազների հայտարարության համաձայն՝ քննիչները պարզել են, որ Իտալիայում հանցավոր խումբը «կապված է այլ օտարերկրյա խմբերի հետ, որոնք ցրված են եվրոպական տարածքում», բոլորն էլ «կապված են միմյանց հետ և կարող են աջակցել միմյանց նյութատեխնիկական առումով, առաջին հերթին՝ զենքով, մարդկանցով ու միջոցներով»:
Իտալական լրատվամիջոցները հաղորդում են, որ Բոյունը տնային կալանքի տակ էր գտնվում Հռոմից հյուսիս գտնվող Վիտերբո քաղաքում և ձերբակալվել է 2022 թվականի օգոստոսին։ Լրատվամիջոցների տեղեկություններով՝ իտալական դատարանը նախկինում մերժել էր նրան Թուրքիա արտահանձնելու խնդրանքը։
