16.12.2025 | 10:46
Արմեն Գրիգորյանը Լոնդոն կմեկնի․ երկկողմ հանդիպում է նախատեսված
Ավտոբուսի վարորդները բողոքի ակցիա են իրականացնում, քաղաքապետարանից պնդում են՝ գործողություններն ուղղորդված են
Հասարակություն
22.05.2024 | 14:58
«Երևանի ավտոբուս» ՓԲԸ-ի վարորդները բողոքի ակցիա են իրականացնում։ Factor TV ահազանգած վարորդներից մեկն ասաց, որ պատճառը «աշխատանքից անհիմն ազատումներն են»։
Վարորդը, որը ներկայանալ չցանկացավ, նշեց, որ վերջերս տնօրենի ժամանակավոր պաշտոնակատար նշանակված Սամվել Նազարյանն աշխատանքի է տեղավորում իր մտերիմներին։
«Այս պահին ավտոբուսները չեն շահագործվում, մենք՝ վարորդներս ավտոբուսների պարկում բողոքի ակցիա ենք անում»,- ասաց վարորդներից մեկը։
«Երևանի քաղաքապետարանը վարորդների այս նախաձեռնությունը ըստ էության դիտարկում է որպես սաբոտաժային քայլ՝ ընդդեմ տրանսպորտի ոլորտում իրականացվող իրական և բովանդակային բարեփոխումների»։ Քիչ առաջ այս բովանդակությամբ հաղորդագրություն է տարածել Երևանի քաղաքապետի մամուլի խոսնակ Հայկ Կոստանյանը։ Նա, մասնավորապես գրել է․ «Հասարակական տրանսպորտի որոշ երթուղիներում վարորդների կողմից, ըստ էության, արձանագրվել են աշխատանքային պարտականությունները չկատարելու և ուղեգծերից անհիմն դուրս գալու դեպքեր: Շատերդ տեղյակ եք, որ այս ոլորտում տևական ժամանակ է իրականացվում են համակարգային բարեփոխումներ, որոնց արդյունքներից մեկն այն է, որ 20.05.2024 կայացած գործակարգավարական խորհրդակցության ընթացքում «Երևան ավտոբուս» ՓԲԸ-ի տնօրենի զեկույցից պարզ դարձավ, որ «Երևանի ավտոբուս» ՓԲԸ-ում ավելի խիստ հսկողության արդյունքում ուղևորափոխադրումների շաբաթական հասույթներն աճում են, ստվերը կրճատվում է, ձեռնարկվում են գործուն քայլեր՝ մեր քաղաքացիներին մատուցվող ծառայությունների որակը բարձրացնելու ուղղությամբ:
Առկա են ստույգ տվյալներ, որ վարորդների կողմից այսօր կատարված այս գործողություններն ուղղորդված են, ուստի հետամուտ ենք լինելու, որպեսզի այս գործողություններն իրականացնողներն ու կազմակերպիչները կրեն քրեաիրավական ամենախիստ պատասխանատվությունը:
Հայցում ենք ձեր ներողամտությունը՝ պատճառված անհարմարությունների համար և վստահեցնում, որ Երևանի քաղաքապետարանի կողմից ձեռնարկվում են բոլոր անհրաժեշտ միջոցները՝ հասարակական տրանսպորտի բնականոն աշխատանքը ամենասեղմ ժամկետներում վերականգնելու համար»,- ֆեյսբուքում գրել է Կոստանյանը։
Արփի Հակոբյան
