24.06.2026 | 13:44
Հայաստանը ՕՊԵԿ հիմնադրամի հետ 80 մլն եվրոյի վարկային համաձայնագիր է ստորագրել
ԱՄՆ Կոնգրեսում պահանջել են Ուկրաինային թույլատրել` ամերիկյան զենքով խփել ՌԴ-ում թիրախներին
Քաղաքականություն
22.05.2024 | 14:13
Ամերիկացի մի խումբ կոնգրեսականներ դիմել են Պենտագոնի ղեկավար Լլոյդ Օսթինին՝ պահանջելով թույլ տալ Ուկրաինային օգտագործել ԱՄՆ-ի տրամադրած զենքը՝ Ռուսաստանի տարածքում գտնվող թիրախներին հարվածելու համար։
«Ուկրաինացիները չկարողացան պաշտպանվել [ԱՄՆ] վարչակազմի ներկայիս քաղաքականության պատճառով: Չափազանց կարևոր է, որ [նախագահ Ջո] Բայդենի վարչակազմն Ուկրաինայի ռազմական ղեկավարներին տրամադրի ռազմական գործողությունների ամբողջական շարք իրականացնելու հնարավորություն»,- ասվում է նամակում, որը ստորագրել են 13 կոնգրեսականներ (յոթ դեմոկրատ և վեց հանրապետական):
Ամերիկացի օրենսդիրների կարծիքով՝ Խարկովի մարզում Ուկրաինայի Զինված ուժերի (ՀԶՈՒ) իրավիճակի վատթարացման ֆոնին Բայդենի վարչակազմը սահմանափակել է ուկրաինական կողմի՝ ամերիկյան զենքի օգնությամբ «ռուսական զորքերը հետ մղելու» հնարավորությունը։
Կոնգրեսականները նաև կոչ են արել լրացուցիչ ուկրաինացի օդաչուների վերապատրաստել F-16 կործանիչների վարման համար։ Նրանց կարծիքով՝ այն 12 օդաչուները, որոնց նախատեսվում է վերապատրաստել մինչև տարեվերջ, բավարար չեն լինի։ Կոնգրեսականների մեկ այլ պահանջ է՝ Կիևին տրամադրել Patriot հակաօդային պաշտպանության համակարգերի անհրաժեշտ քանակը։
