11.08.2026 | 20:57
Հունգարիան նոր նախագահ ունի
Բելառուսը պատրաստվում է Արցախում 420 ընտանիքի համար բնակավայր կառուցել
Քաղաքականություն
17.05.2024 | 17:23
Բելառուսը նախատեսում է Արցախում 420 ընտանիքի համար բնակավայր կառուցել։ Այս մասին Շուշիում լրագրողներին ասել է Բելառուսի ճարտարապետության և շինարարության նախարար Ռուսլան Պարխամովիչը։
Նա ընդգծել է, որ Բելառուսն ու Ադրբեջանը մի քանի տարի է՝ համագործակցում են շինարարության ոլորտում։
«Հիմա մենք պայմանավորվել ենք մի նոր լուրջ քայլի շուրջ։ Մենք նախատեսել ենք կոնկրետ բնակավայր՝ նման ագրոքաղաքի։ Աշխատելու ենք գյուղատնտեսության նախարարության մեր գործընկերների հետ, քանի որ այստեղ շատ կարևոր է մարդկանց ապահովել ոչ միայն հարմարավետ բնակարաններով, այլև աշխատանքի արժանապատիվ վայրերով»,- ասել է Պարխամովիչը։
Նա նշել է, որ օբյեկտը կկառուցվի Աղդամի շրջանում, բնակավայրը նախատեսված կլինի 420 ընտանիքի համար։ Իսկ դրա ճարտարապետությունը կօգտագործի բելառուսական կոլորիտը:
«Մենք նախատեսում ենք զբաղվել ինչպես բնակարանների, այնպես էլ ենթակառուցվածքների՝ տրանսպորտային, ինժեներական և սոցիալական օբյեկտների կառուցմամբ: Առաջիկա մի քանի ամիսների ընթացքում մենք կմշակենք և մեր գործընկերներին կներկայացնենք հայեցակարգ, որը նրանք կհաստատեն, և մենք ակտիվորեն կաշխատենք։ Եթե ամեն ինչ լավ ստացվի, առաջիկայում մեր աշխատանքը կընդլայնենք ևս մի քանի օբյեկտներով»,- նշել է բելառուս նախարարը։
Հիշեցնենք, որ Բելառուսի նախագահ Ալեքսանդր Լուկաշենկով այսօր Ադրբեջանի նախագահ Իլհամ Ալիևի հետ շրջայց է կատարում Արցախում բնակավայրերում։ Նրանք այցելել են Վարանդա, ինչպես նաև հայաթափված Շուշի քաղաք։
