24.02.2026 | 20:33
Մերի Գասպարյանը որոնվում է որպես անհետ կորած
Վլադիմիր Պուտինը Պեկինում հանդիպել է Սի Ցզինպինի հետ
Քաղաքականություն
16.05.2024 | 12:10
Ռուսաստանի նախագահ Վլադիմիր Պուտինը և Չինաստանի նախագահ Սի Ցզինպինն այսօր՝ մայիսի 16-ին, Պեկինի Ժողովրդական Մեծ դահլիճում բանակցություններ են վարել «նեղ շրջանակում»: Միջազգային լրատվամիջոցների հաղորդմամբ՝ Սին շնորհավորել է Պուտինին հինգերորդ ժամկետով Ռուսաստանի ղեկավարի պաշտոնը ստանձնելու կապակցությամբ և ընդգծել, որ «Չինաստանի և Ռուսաստանի միջև հարաբերությունների կայուն զարգացումը համապատասխանում է ոչ միայն երկու երկրների և ժողովուրդների հիմնարար շահերին, այլև օգուտ է բերում տարածաշրջանում և ամբողջ աշխարհում խաղաղության, կայունության և բարգավաճման գործին», փոխանցում է DW-ի ռուսական ծառայությունը:
Չինաստան կատարած այցը Պուտինի առաջին արտասահմանյան ուղևորությունն է նախագահի պաշտոնում հինգերորդ անգամ վերընտրվելուց հետո։ Վերջին անգամ նա եղել է Չինաստանում 2023 թվականի հոկտեմբերին։ Սիի խոսքով՝ Պուտինն ու ինքը հանդիպել են «առնվազն 40 անգամ»։
«Նման սերտ կապերը մեզ թույլ են տալիս ուրվագծել ռուս-չինական հարաբերությունների կայուն և արագ աճի դինամիկան պահպանելու ռազմավարական ուղղությունները, որոնք ամենևին էլ հեշտ չեն եղել և, հետևաբար, արժանի են խնամքով վերաբերմունքի»,- չինական «Սինհուա» գործակալության փոխանցմամբ՝ ասել է Ցզինպինը։
Պուտինն իր հերթին նշել է, որ Չինաստանը Ռուսաստանի հիմնական գործընկերն է առևտրատնտեսական ոլորտում՝ նշելով, որ 2023 թվականին երկկողմ ապրանքաշրջանառությունն աճել է գրեթե մեկ քառորդով և հասել 227 մլրդ դոլարի։
Արևմուտքում, Ուկրաինա ռուսական լայնամասշտաբ ռազմական ներխուժման մեկնարկից հետո, բազմիցս են ենթադրություններ հնչել, որ Պեկինն օգնում է Մոսկվային շրջանցել այս հակամարտության հետ կապված տնտեսական պատժամիջոցները։ Բացի այդ, Չինաստանը կարող է Ռուսաստանին մատակարարել երկակի նշանակության ապրանքներ, որոնք անհրաժեշտ են անօդաչու թռչող սարքերի և այլ ռազմական արտադրանքի արտադրության համար, ենթադրում են փորձագետները։
Պուտինը Պեկին է ժամանել մայիսի 15-ի ուշ երեկոյան։ Սպասվում է, որ նրա պաշտոնական այցը Չինաստան կտևի մինչև մայիսի 17-ը։ Պուտինին ուղեկցում են ՌԴ պաշտպանության նորանշանակ նախարար Անդրեյ Բելոուսովը, արտգործնախարար Սերգեյ Լավրովը, Անվտանգության խորհրդի նորանշանակ քարտուղար Սերգեյ Շոյգուն և Պուտինի օգնական Յուրի Ուշակովը։
