Իշխանափոխության հիմքեր չեմ տեսնում այս շարժման արդյունքում․ չունեն օրակարգ, որը համոզիչ է մարդկանց․ Բորիս Նավասարդյան․ ՏԵՍԱՆՅՈՒԹ

ԱԺ ընդդիմությունը դեռ չի սկսել վարչապետին անվստահություն հայտնելու գործընթաց՝ 36 ստորագրություն է անհրաժեշտ, կամ՝ «Պատիվ ունեմ» խմբակցությունից դեռևս 2021 -ին դուրս եկած անկախ պատգամավոր Իշխան Զաքարյանը պետք է ստորագրի, կամ ՔՊ-ական։ Թեև Բագրատ արքեպիսկոպոս Գալստանյանը հանրահավաքին հայտարարեց, որ հանդիպել է Զաքարյանի հետ, և վերջինս, ըստ հոգևորականի, «որոշակի մտածումներով չի մերժել» միանալ վարչապետին անվստահություն հայտնելու գործընթացին։ Քաղաքական վերլուծաբան Բորիս Նավասարդյանին հարց ուղղեցինք, թե նա ինչպե՞ս է գնահատում Բագրատ արքեպիսկոպոս Գալստանյանի, մյուս եկեղեցականների, ինչպես նաև քաղաքական ընդդիմության՝ ՀՅԴ-ի, ՀՀԿ-ի, ԱԺԲ-ի, ԼՀԿ-ի համատեղ պայքարը Նիկոլ Փաշինյանի հրաժարականի պահանջով։ Ինչո՞ւ այս պահի դրությամբ համահայաստանյան բնույթ չի ստանում, ինչպես 2018-ին Նիկոլ Փաշինյանի առաջնորդած շարժումը։

«Ինձ թվում է, որ որևէ քաղաքական շարժման հիմքեր և պատճառներ կային․ մարդիկ մտահոգված են տարբեր հարցերով՝ անվտանգության, երկրի կառավարման արդյունավետության, դրա որակի հետ կապված։ Քանի որ կան սոցիալ քաղաքական առումով ակտիվ քաղաքացիներ, որոնք պատրաստ են միանալ ցանկացած շարժման։ Տավուշի մարզում կա կոնկրետ առիթ, ուր կան բնակիչներ, որոնք մտահոգված են սահմանազատման հարցով, մտահոգված են, որ բավարար իրազեկվածություն չկա, թե իրենց ինչ է սպասում։ Այդ սիգնալը հասնում է ամբողջ հասարակությանը, և իմ նշած մտահոգ և ակտիվ մարդիկ միանում են շարժմանը՝ դրանից փորձում են օգտվել նաև քաղաքական ուժեր»։ Բորիս Նավասարդյանն ասաց, որ իր կանխատեսմամբ՝ Բագրատ արքեպիսկոպոս Գալստանյանի շարժումը չի ստանա 2018-ի տեսքը, քանի որ այն չունի հստակ օրակարգ՝ բացի Փաշինյանի հրաժարականից, ու նաև՝ ընդդիմությունը այլընտրանքային ծրագիր չի ներկայացնում։ Հետևաբար, նա իշխանափոխության հիմքեր չի տեսնում այս շարժման արդյունքում։

Հարցազրույցն ամբողջությամբ՝ տեսանյութում։

Ռոբերտ Անանյան