06.12.2025 | 23:56
Կապարակնքել են Գյումրիի Յոթ Վերք եկեղեցու դռները` Փաշինյանի այցից առաջ
Թուրքիայի և Հունաստանի միջև «անլուծելի խնդիրներ չկան»․ Էրդողանը՝ Միցոտակիսին
Քաղաքականություն
14.05.2024 | 16:57
Թուրքիայի նախագահ Ռեջեփ Թայիփ Էրդողանը Անկարայում Հունաստանի վարչապետ Կիրիակոս Միցոտակիսի հետ բանակցությունների ժամանակ ասել է, որ իրենց երկրների միջև «անլուծելի խնդիրներ չկան», փոխանցում են թուրքական լրատվամիջոցները։
«Չնայած տարաձայնություններին՝ մենք կենտրոնանում ենք դրական օրակարգի վրա՝ բաց պահելով մեր երկխոսության ուղիները»,- ասել է Էրդողանը Միցոտակիսի հետ համատեղ ասուլիսում։
Միցոտակիսն իր հերթին նշել է, որ վերջին ամիսներին առաջնորդների հաճախակի հանդիպումներն «ապացուցել են, որ հարևանները կարող են փոխըմբռնում ցուցաբերել ոչ թե որպես բացառություն, այլ որպես արդյունավետ նորմալ իրավիճակ»:
«Մենք այսօր ցույց տվեցինք, որ տարաձայնությունների կողքին կարող ենք զուգահեռաբար գծել պայմանավորվածությունների էջը»,- հավելել է նա։
Երկու առաջնորդները համաձայնության չեն եկել պաղեստինյան ՀԱՄԱՍ-ի զինյալների որակավորման հարցում: Էրդողանը կրկնել է իր տեսակետը, որ դա «դիմադրության շարժում» է՝ ասելով, որ իրեն տխրեցնում է հունական տեսակետը, որը կիսում են արևմտյան շատ այլ երկրներ, որ ՀԱՄԱՍ-ն ահաբեկչական կազմակերպություն է։ Էրդողանը նաև հայտարարել է, որ ՀԱՄԱՍ-ի 1000-ից ավելի անդամներ Թուրքիայում բուժում են ստանում։ Ավելի ուշ Անկարան հստակեցրել է, որ Էրդողանը սխալվել է, և խոսքը Գազայի պաղեստինցիների մասին է։
Միաժամանակ, Հունաստանի վարչապետը դժգոհություն է հայտնել Չորայի բյուզանդական եկեղեցին մզկիթի վերածելու՝ թուրքական իշխանությունների որոշման վերաբերյալ՝ այն անվանելով «ցավալի»։
«Ես հավատում եմ, որ այս արտասովոր վայրը պատկանում է ամբողջ մարդկությանը»,-ասել է նա։
Էրդողանը վստահեցրել է, որ իր կառավարությունը «հանձնառու է պահպանել ՅՈՒՆԵՍԿՕ-ի կողմից ճանաչված յուրաքանչյուր մշակութային ժառանգություն և Չորայի մզկիթը նոր ինքնությամբ այժմ բաց է բոլորի համար»:
Թուրքիան 2020 թվականին պաշտոնապես մզկիթի է վերածել Չորայի բյուզանդական ժամանակաշրջանի Սուրբ Փրկիչ եկեղեցին, որը հայտնի է թուրքերեն Կարիյե անունով։ Պաշտոնապես, սակայն, եկեղեցին որպես մզկիթ Թուրքիայի նախագահ Ռեջեփ Թայիփ Էրդողանի կողմից բացվել է օրերս՝ հունական ուղղափառ Սուրբ Զատկի տոնից մեկ օր անց, որն էլ արժանացել է պաշտոնական Աթենքի և հունական ուղղափառ եկեղեցու քննադատությանը:
Էմմա Չոբանյան
