07.12.2025 | 21:40
Վարդենյաց լեռնանցքում ձյուն է տեղում. Դիլիջանի, Սպիտակի ոլորաններում մառախուղ է
Բերքաբերի 900 հեկտար հողատարածքը, որն Ադրբեջանի վերահսկողության տակ է, այս փուլում չի վերադարձվում․ Բերքաբերի վարչական ղեկավար
Քաղաքականություն
30.04.2024 | 18:16
Տավուշի մարզի Նոյեմբերյան խոշորացված համայնքի Բերքաբերի հատվածում ականազերծման աշխատանքներն ավարտվել են, բայց սահմանազատումը դեռ ընթացքի մեջ է, այս մասին Factor.am-ի հետ զրույցում հայտնեց վարչական ղեկավար Տիգրան Հարությունյանը։
Նրա խոսքով՝ իրենց տարածքում էլ են սահմանային սյուներ տեղադրել, բայց թե քանի հատ՝ Տիգրան Հարությունյանը տեղյակ չէ։
Վարչական ղեկավարը հայտնեց, որ Բերքաբերի՝ Ադրբեջանի վերահսկողության տակ եղած շուրջ 900 հեկտար հողատարածքն այս փուլում չի վերադարձվում։ Հարությունյանի փոխանցմամբ իրենց ասել են՝ հաջորդ փուլում այդ հարցը կքննարկվի, բայց թե որ փուլում, այդպես էլ պարզ չէ։
«Ոչ մի հստակություն չկա։ Ըստ կառավարության խոսքի՝ այս մեկը բարեհաջող կավարտվի, նոր հաջորդ փուլի համար քննարկումներ կսկսվեն։ Այս պահին ոչինչ պարզ չէ»,- ընդգծեց նա։
Տիգրան Հարությունյանը Փաշինյանի ստեղծած սահմանազատման և սահմանային անվտանգության հարցերով հանձնաժողովին կից աշխատանքային խմբում է ընդգրկված։ Ասաց, որ իրենց հուզող բոլոր հարցերն ու բերքաբերցիների դիրքորոշումները ներկայացրել է։ Նա նաև հայտնեց, որ Բերքաբերի կամ Ջողազի ջրամբարի տարածքում ևս, որի մի ափը ադրբեջանական կողմի վերահսկողության տակ է, այս փուլում սահմանազատում չի արվում, և Ադրբեջանի զինված ուժերը տեղակայված են այդ տարածքներում։
«Ջրամբարի մյուս ափը մեր վարչական տարածքն է, որը որ փուլում էլ լինի, պետք է վերադարձվի։ Դա փաստաթղթով հիմնավորված է, որ ջրամբարի մյուս ափը մեր վարչական տարածքում է»,- ասաց վարչական ղեկավարը։
Հիշեցնենք, որ ավելի վաղ պաշտպանության նախարարությունը հաղորդել էր, որ Բերքաբերի հատվածում ականազերծման աշխատանքների շրջանակում տեղի են ունենում պայթեցման աշխատանքներ։
Հավելենք՝ կառավարության փոխանցմամբ՝ Հայաստանի Հանրապետության և Ադրբեջանի Հանրապետության սահմանին գեոդեզիական չափումների հիման վրա՝ կոորդինատների ճշգրտման աշխատանքների շրջանակներում, ապրիլի 29-ի դրությամբ իրականցվել է նախատեսված աշխատանքների կեսից ավելին՝ տեղադրվել է թվով 35 սահմանային սյուն։ Երկու երկրների փորձագիտական խմբերի աշխատանքները շարունակվում են։
Մանյա Պողոսյան
