07.04.2026 | 18:36
Կրակել է համագյուղացու ուղղությամբ, որը մահացել է. ոստիկանները «Զվարթնոց» օդանավակայանում ձերբակալել են 41-ամյա բնակչին
Բլինքենը Ալիևին կոչ է արել շարունակել ՀՀ-ի հետ բանակցությունները ու ազատել անարդարացի ձերբակալվածներին, Ադրբեջանի նախագահը կրկին բողոքել է բաժանարար գծերից
Քաղաքականություն
29.04.2024 | 00:56
ԱՄՆ պետքարտուղար Էնթոնի Բլինքենը ՀՀ վարչապետ Նիկոլ Փաշինյանի հետ ունեցած հեռախոսազրույցից զատ զրուցել է նաև Ադրբեջանի նախագահ Իլհամ Ալիևի հետ։ Պետքարտուղարության հաղորդագրության համաձայն՝ Բլինքենը ողջունել է Ալիևի անցյալ շաբաթ արած հայտարարությունը, թե Հայաստանն ու Ադրբեջանը համաձայնել են օգտագործել 1991թ. Ալմա Աթայի հռչակագիրը որպես սահմանների սահմանազատման հիմք, և ընդգծել է դրա կարևորությունը երկու կողմերի համար կայուն և արժանապատիվ խաղաղություն կնքելու հարցում։
Պետքարտուղարը հորդորել է Ալիևին շարունակել բանակցությունները իր հայ գործընկերոջ հետ՝ վերահաստատելով այդ ջանքերին աջակցելու ԱՄՆ պատրաստակամությունը։
«Պետքարտուղար Բլինքենն ընդգծել է ԱՄՆ-ի և Ադրբեջանի միջև ամուր երկկողմ հարաբերություններին մեր հանձնառությունը՝ նշելով էներգետիկայի, կլիմայի և հաղորդակցության ոլորտներում ընդհանուր նպատակների շուրջ համագործակցելու մեր ջանքերը և ապահովելու Բաքվում COP 29-ի հաջողությունը»,-ասվում է հաղորդագրությունում։
ԱՄՆ պետքարտուղարը անդրադարձել է նաև Ադրբեջանում մարդու իրավունքների իրավիճակին՝ ողջունելով տնտեսագետ ու ընդդիմադիր գործիչ Գուբադ Իբադօղլուի տնային կալանքից ազատումը որպես մարդասիրական ժեստ և կոչ է արել նրան շուտափույթ ազատ արձակել։ Բլինքենը կրկին հորդորել է Ադրբեջանին հավատարիմ մնալ մարդու իրավունքների պաշտպանության միջազգային պարտավորություններին և ազատ արձակել երկրում անարդարացիորեն ձերբակալվածներին։
Սդրբեջանի նախագահականի տարածած հաղորդագրության համաձայն էլ՝ Բլինքենը նախ շնորհավորել է Հայաստանի և Ադրբեջանի միջև սահմանազատման հարցում ձեռք բերված պայմանավորվածության կապակցությամբ՝ ընդգծելով, որ դա ողջունվում է ԱՄՆ-ի կողմից։ Պետքարտուղարը նշել է, որ Միացյալ Նահանգները պատրաստ է շարունակել աջակցել Հայաստանի և Ադրբեջանի միջև հարաբերությունների կարգավորմանը և խաղաղության օրակարգի առաջմղմանը։
Ալիևն էլ ասել է, որ երկու երկրների սահմանազատման հանձնաժողովի ձեռք բերած պայմանավորվածությունը երկկողմանի հիմունքներով վարվող բանակցությունների արդյունք է երկխոսության և փոխըմբռնման պայմաններում։ Նա ընդգծել է, որ դելիմիտացիայի գործընթացից հետո երկու երկրների սահմանին դեմարկացիայի՝ սահմանագծման աշխատանքների մեկնարկը դրական քայլ է։
Ալիևը նաև նշել է, որ ղազախական կողմի առաջարկով խաղաղության պայմանագրի շուրջ բանակցությունները շարունակելու համար մոտ ապագայում Ալմաթիում կհանդիպեն Ադրբեջանի և Հայաստանի արտգործնախարարները։ Ադրբեջանի նախագահն ասել է, թե Բաքուն ջանք չի խնայի խաղաղության օրակարգը շարունակելու համար՝ նշելով, որ Ադրբեջանը կոնկրետ այս դեպքում ուժեղ քաղաքական կամք ունի։
Միեւնույն ժամանակ Ալիևը բողոքել է բաժանարար գծերից՝ նշելով, թե Ադրբեջանը աջակցում է տարածաշրջանային համագործակցության ինտեգրված հարավկովկասյան մոդելի կառուցմանը՝ առանց բաժանարար գծերի։
Էմմա Չոբանյան
