07.10.2026 | 16:53
«Հայ, թուրք, ադրբեջանցի․ ինչի՞ համար են էդ շահարկումները»․ Նիկոլ Փաշինյան․ ՏԵՍԱՆՅՈՒԹ
Իսրայելը փորձում է կանխել մայիսին Սպիտակ տանը կայանալիք Բայդեն-Էրդողան հանդիպումը․ Hürriyet
Քաղաքականություն
24.04.2024 | 16:46
Թուրքիայի իշխանությունների հետ սերտ կապեր ունեցող Hürriyet-ի սյունակագիր Աբդուլքադըր Սելվին հերքում է լուրերը, թե նախագահ Ռեջեփ Թայիփ Էրդողանը չեղարկել է այցը ԱՄՆ՝ Իսրայելին 26 միլիարդ դոլարի օգնության հաստատման պատճառով։
«ԱՄՆ-ից որևէ տեղեկություն չկա այն մասին, որ նախագահ Էրդողանի այցը Միացյալ Նահանգներ չեղարկվել է։ Ամերիկացիներն արդեն ուզում են, որ այս այցը կայանա։ ԱՄՆ այցի չեղարկում չկա։ Նրանք պատրաստվում են Բայդեն-Էրդողան հանդիպմանը, որը պետք է տեղի ունենա մայիսի 9-ին։ Անցյալ շաբաթ Անկարայում էր ԱՄՆ պետքարտուղարի տեղակալ Ջոն Բասը՝ հանդիպման նախապատրաստական աշխատանքների համար»,- ասվում է հրապարակման մեջ։
Սելվին նշում է, որ համապատասխան գերատեսչություններն Էրդողանից հրահանգ չեն ստացել այն մասին, որ ԱՄՆ այցը չեղարկվել է։
Լրագրողը հայտնում է, որ ԱՄՆ-ում իսրայելական լոբբին է փորձում կանխել հանդիպումը։ Սելվին նշում է, որ Էրդողանի ու ՀԱՄԱՍ-ի քաղաքական ղեկավար Իսմայիլ Հանիյեի հետ հանդիպումից հետո ԱՄՆ կողմում մի խումբ ցանկանում է կանխել այն։
«Հանիյեի հանդիպումից հետո Իսրայելը փորձում է կանխել Էրդողան-Բայդեն հանդիպումը։ Նրանք ցանկանում են դա անել Թուրքիայի միջոցով։ Նրանք փորձում են աջ ու ձախ հարվածել այն լուրով, որ Թուրքիայի նախագահը չեղարկել է իր այցը ԱՄՆ»,- ասվում է հոդվածում։
Հավելենք, որ ԱՄՆ նախագահի պաշտոնում Ջո Բայդենի ընտվելուց հետո Էրդողանն այդպես էլ ընդունելության չի արժանացել Սպիտակ տանը։ Անկարան ակտիվ ջանքեր էր գործադրում հանդիպման կազմակերպման համար։ Էրդողանը Բայդենի հետ հանդիպումներ է ունեցել միջազգային գագաթնաժողովների շրջանակում, իսկ վերջին անգամ նրանք հանդիպել են անցյալ տարվա հուլիսին Լիտվայում ՆԱՏՕ-ի գագաթնաժողովի ժամանակ։
Էմմա Չոբանյան
