Նեթանյահուն փորձում է տարածաշրջանը ներքաշել պատերազմի մեջ՝ իշխանության ղեկին մնալու համար․ Թուրքիայի ԱԳ նախարար

Թուրքիայի ԱԳ նախարար Հաքան Ֆիդանը Կատարի վարչապետ և ԱԳ նախարար Մուհամեդ բին Աբդուրռահման Աս-Սանիի հետ համատեղ մամուլի ասուլիսում հայտարարել է, որ տարածաշրջանի երկրները չեն ցանկանում, որ երրորդ կողմերն իրենց հակամարտություները տեղափոխեն այստեղ։ Նա հայտնել է, որ Կատարի իր գործընկերոջ հետ քննարկել են տարածաշրջանում վերջին զարգացումները։

«Մենք հենց սկզբից հայտարարել էինք, որ Իսրայելի կողմից Գազայում իրականացված հանցագործությունները կարող են վերածվել տարածաշրջանային հակամարտության և զգուշացրել դրա սրման ու տարածման հավանականության մասին»,- ասել է Ֆիդանը՝ նշելով, որ վերջին օրերի իրադարձությունները ցույց են տալիս բոլորին, որ տարածաշրջանից դուրս գտնվող երկրների հետ պատերազմի հավանականությունն այնքան էլ հեռու չէ, այդ ռիսկը դեռ պահպանվում է։

Ըստ Թուրքիայի ԱԳՆ ղեկավարի՝ մինչ այս իրադարձություններն ակտիվ ջանքեր են գործադրվել լարվածությունը վերահսկելի հաղթահարելու համար, մի քանի հանդիպումներ են եղել, և այդ ջանքերը շարունակվում են։ Նա նշել է, որ զսպվածության հաղորդագրություններ են փոխանցվել բոլոր համապատասխան կողմերին։

«Առաջին հերթին՝ միջազգային իրավունքը պարտադիր է բոլորի համար։ Համաշխարհային մակարդակում խաղաղության և կայունության բանալին միջազգային իրավունքին համապատասխանությունն է: Երկրորդ՝ պարզ է, որ Իսրայելի վարչապետ Բենիամին Նեթանյահուն փորձում է տարածաշրջանը ներքաշել պատերազմի մեջ՝ իշխանության մնալու համար։ Նրանք, որոնք միանշանակ և անվերապահորեն աջակցում են Նեթանյահուին, պետք է շտապ վերանայեն իրենց դիրքորոշումը։ Երրորդ՝ և ամենակարևորը, տեղի ունեցողի հիմքում Իսրայելի բռնությունն ու հալածանքն են Գազայում: Ուզում եմ ընդգծել, որ ո՛չ Իսրայելը, ո՛չ Իրանն այս պահին զոհ չեն։ Զոհը Գազայի ժողովուրդն է»,- հայտարարել է Թուրքիայի ԱԳ նախարարը։

Նա հավելել է՝ Նեթանյահուն փորձում է տարածաշրջանը ներքաշել պատերազմի մեջ՝ իշխանության ղեկին մնալու համար։