Սերբիայի նախագահն Ալիևից աջակցություն է խնդրել

Սերբիայի նախագահ Ալեքսանդր Վուչիչն Ադրբեջանի նախագահ Իլհամ Ալիևի հետ հեռախոսազրույցում տեղեկացրել է վերջին շրջանում Սերբիայի նկատմամբ կիրառվող ճնշումների մասին և խնդրել բարեկամ Ադրբեջանի ժողովրդի աջակցությունը, հայտնում է Ադրբեջանի նախագահի մամուլի ծառայությունը։

Հաղորդագրության համաձայն՝ նշելով, որ Ադրբեջանը և Սերբիան միշտ աջակցել են միմյանց տարածքային ամբողջականությանը և ինքնիշխանությանը, Իլհամ Ալիևն ընդգծել է, որ այս դիրքորոշումը կշարունակվի նաև ապագայում։ Այս համատեքստում նշվել է միջազգային կազմակերպությունների շրջանակում երկու երկրների հաջող համագործակցությունը։

Ալիևը Վուչիչին հրավիրել է Բաքվում կայանալիք COP 29-րդ համաժողովին, որը Սերբիայի նախագահն ընդունել է։

«Զրույցի ընթացքում գոհունակություն է արտահայտվել, որ Ադրբեջանի և Սերբիայի միջև հարաբերությունները կրում են ռազմավարական գործընկերության բնույթ, նշվել է բարձր մակարդակի փոխայցելությունների կարևորությունը մեր երկրների միջև կապերի զարգացման գործում»,- ասվում է հաղորդագրության մեջ։

Սերբիայի նախագահն իր հերթին Instagram-ում անդրադարձել է Ալիևի հետ հեռախոսազրույցին։

«Ես նախագահ Ալիևին տեղեկացրել եմ Սերբիայի նկատմամբ բազմաթիվ ճնշումների մասին և խնդրել Ադրբեջանի ժողովրդի բարեկամական և եղբայրական աջակցությունը։ Միևնույն ժամանակ, ես մատնանշեցի Բելգրադի և Բաքվի միջև համագործակցության բացառիկ մակարդակը՝ նախագահ Ալիևին հրավիրելով այցելել Սերբիա։ Ես հայտնեցի իմ համոզմունքը, որ մեր հարաբերությունները կշարունակեն զարգանալ՝ ինչպես վերջին մի քանի տարիներին»,- գրել է Վուչիչը։

Սերբիայի նախագահը, սակայն, չի մանրամասնել, թե ինչ ճնշումների մասին է խոսքը և ինչ աջակցություն է ակնկալում Բաքվից։