10.12.2025 | 21:28
Կրոնական ազատությունը Հայաստանում ժողովրդավարության կարևոր բաղադրիչներից է։
Բաքուն արձագանքել է Ադրբեջանից իր դեսպանին հետ կանչելու՝ Փարիզի որոշմանը
Քաղաքականություն
17.04.2024 | 11:41
Ադրբեջանի ԱԳՆ-ն արձագաքել է Բաքվում իր դեսպան Անն Բուայոնին հետ կանչելու՝ Փարիզի որոշմանը։ Մասնավորապես, Ադրբեջանի ԱԳՆ մամուլի խոսնակ Այխան Հաջիզադեն հայտարարել է, թե չնայած գրեթե 25 տարի Ֆրանսիայի միջնորդի դերին՝ 2020 թվականի Արցախյան 44-օրյա պատերազմից հետո «Փարիզի ակնհայտ հակաադրբեջանական քայլերը հայտնի են բոլորին»։
«Չնայած Ադրբեջանի կողմից միակողմանի գործողությունների մասին ֆրանսիական կողմի մեղադրանքներին՝ մեր երկրի քայլերն ու պաշտոնական հայտարարությունները Ֆրանսիայի հասցեին ընդամենը պատասխան են այս երկրի ապակառուցողական գործունեությանը։ Չնայած մեր երկրի դեմ զրպարտչական արշավին՝ մենք միշտ բաց ենք եղել երկխոսության համար»,- ասել է նա։
Հաջիզադեն նշել է, թե «Ֆրանսիան լրջորեն կասկածի տակ է դրել ինքնիշխանության և տարածքային ամբողջականության հիման վրա Ադրբեջանի և Հայաստանի միջև հարաբերությունների կարգավորմանն ուղղված ջանքերը, մասնավորապես, վերջին երեքուկես տարիների ընթացքում ձեռնարկված քայլերով՝ դրանով իսկ սրելով իրավիճակը»։
«Ֆրանսիայի կողմից բազմիցս Ադրբեջանի դեմ փաստաթղթերի նախագծերի նախաձեռնումն այնպիսի կազմակերպություններում, ինչպիսիք են ՄԱԿ-ի Անվտանգության խորհուրդը, ԵՄ-ն, Ֆրանկոֆոնիայի միջազգային կազմակերպությունը և այլ հարթակներ, ապացուցեցին այս երկրի՝ որպես չեզոք միջնորդի պնդումների լիակատար անհիմն լինելը»,- ասել է Հաջիզադեն։
Նա դժգոհություն է հայտնել նաև Արցախի վերաբերյալ Ֆրանսիայի Սենատի և Ազգային ժողովի ընդունած բանաձևերից։
«Ֆրանսիան, որը համակողմանիորեն զինում է Հայաստանին և տարածաշրջանում ռազմատենչություն է քարոզում, չի ծառայում խաղաղությանը։ Ադրբեջանական կողմը բազմիցս հայտարարել է Ֆրանսիային, որ սպառնալիքների և ճնշումների լեզվով խոսելն արդյունք չի բերի, և կրկին հայտարարում է, որ կձեռնարկի բոլոր անհրաժեշտ միջոցները՝ իր ազգային շահերը պաշտպանելու համար»,- նշել է Ադրբեջանի ԱԳՆ խոսնակը։
Հավելենք՝ Ֆրանսիան ԱԳՆ-ն հայտնել է, որ Փարիզը որոշել է հետ կանչել Ադրբեջանում իր դեսպանին խորհրդակցությունների համար՝ կապված վերջին ամիսներին Ադրբեջանի կողմից երկու երկրների հարաբերությունները վնասող միակողմանի գործողությունների հետ։
Նշենք, որ Արցախյան 44-օրյա պատերազմից հետո պաշտոնական Բաքուն ակտիվորեն զբաղվում է հակաֆրանսիական գործունեությամբ։ Ադրբեջանը կալանավորել է Ֆրանսիայի քաղաքացու՝ մեղադրելով, իբր, լրտեսության մեջ, ինչպես նաև ֆրանսիական դեսպանատան երկու աշխատակցի անցանկալի անձ է հայտարարել ու վտարել երկրից։
