10.12.2025 | 21:28
Կրոնական ազատությունը Հայաստանում ժողովրդավարության կարևոր բաղադրիչներից է։
Տարածաշրջանի երկրները կարող են ապավինել Իրանի զինված ուժերին․ Ռաիսի
Քաղաքականություն
17.04.2024 | 13:06
Իրանի նախագահ Իբրահիմ Ռաիսին հայտարարել է, որ տարածաշրջանի երկրները կարող են ապավինել Իրանի հզոր զինված ուժերին։ Mehr-ի փոխանցմամբ՝ այս մասին Ռաիսին հայտարարել է այսօր Թեհրանում Ազգային բանակի օրվան նվիրված արարողության ժամանակ ունեցած ելույթում։
Նրա խոսքով՝ Իսլամական հեղափոխության շնորհիվ Իրանի զինված ուժերն այժմ ինքնաբավ են և արտադրում են տարբեր տեսակի հայրենական անօդաչու թռչող սարքեր և հրթիռներ: Ըստ Ռաիսիի՝ Իսլամական հեղափոխության պահապանների կորպուսն ուժեղ աջակցություն է ցուցաբերում Իրանի իշխանությանը, և տարածաշրջանի երկրները կարող են ապավինել ԻԻՀ զինված ուժերին։
Երկրի նախագահը նաև ողջունել է երկրի զինված ուժերի միասնությունը՝ դժվարին պահերին ժողովրդի կողքին կանգնելու համար։
Անդրադառնալով Իսրայելի վրա Իրանի ռազմական հարձակմանը՝ Ռայիսին նախ այն «հակասիոնիստական գործողություն» է որակել, ապա շեշտել, որ «այն սիոնիստներին պատժելու ճշգրիտ գործողություն էր»։
Իրանի նախագահը, միաժամանակ, Իսրայելի վրա հարձակումը սահմանափակ գործողություն է անվանել՝ նշելով, որ «եթե Թեհրանը ցանկանա լայնածավալ գործողություն իրականացնել Իսրայելի դեմ, ապա այդ ռեժիմից ոչինչ չի մնա»։
