07.10.2026 | 14:45
Արմավիրի մարզում հրդեհային անվտանգության խախտումների պատճառով 4 գազաբենզալցակայան կապարակնքվել է
Սի Ցզինպինը հրաժարվել է աջակցել Ուկրաինայի հարցով խաղաղության կոնֆերանսին՝ առանց Ռուսաստանի մասնակցության
Քաղաքականություն
16.04.2024 | 21:42
Չինաստանի առաջնորդ Սի Ցզինպինը Պեկինում Գերմանիայի կանցլեր Օլաֆ Շոլցի հետ հանդիպմանը հայտարարել է, որ Պեկինն աջակցում է Ուկրաինայի հարցով խաղաղության կոնֆերանսի անցկացմանը, սակայն միայն Ռուսաստանի մասնակցությամբ։ Այս մասին հայտնել է Չինաստանի արտաքին գործերի նախարարությունը։
Երկու երկրների ղեկավարները մտքեր են փոխանակել «ուկրաինական ճգնաժամի» վերաբերյալ և հայտարարել, որ Չինաստանը և Գերմանիան պարտավորվում են հավատարիմ մնալ ՄԱԿ-ի կանոնադրության նպատակներին և սկզբունքներին, դեմ են միջուկային զենքի կիրառմանը կամ խաղաղ միջուկային օբյեկտների վրա հարձակումներին, ինչպես նաև պնդում են պատշաճ կերպով լուծել միջազգային պարենային անվտանգության և միջազգային մարդասիրական իրավունքի հարգման խնդիրները։
Ըստ հաղորդագրության՝ Սի Ցզինպինը նշել է ստեղծված իրավիճակում հայտնված բոլոր կողմերի համատեղ աշխատանքի անհրաժեշտությունը՝ հնարավորինս շուտ խաղաղությունը վերականգնելու համար։
«Չինաստանն «ուկրաինական ճգնաժամի» կողմ կամ մասնակից չէ, բայց յուրովի նպաստում է խաղաղ բանակցություններին։ Չինաստանը խրախուսում և աջակցում է ճգնաժամի խաղաղ հանգուցալուծմանը նպաստելու բոլոր ջանքերը»,- ասել է նա։
Դրա համար, ՉԺՀ-ի ղեկավարի կարծիքով, անհրաժեշտ է «հրաժարվել եսասիրական օգուտներից, խուսափել հետագա սրացումներից և նվազեցնել բացասական ազդեցությունը համաշխարհային տնտեսության վրա»։
