15.12.2025 | 12:22
Մահացել է կոմպոզիտոր Լևոն Օգանեզովը
ՄԱԿ-ի գլխավոր քարտուղարը, ԱՄՆ-ը, ԵՄ-ն, Մեծ Բրիտանիան և Գերմանիան աջակցել են Իսրայելին Իրանի հարձակման ֆոնին
Քաղաքականություն
14.04.2024 | 09:41
ՄԱԿ-ի գլխավոր քարտուղար Անտոնիո Գուտերեշը և արևմտյան երկրներն աջակցել են Իսրայելին և դատապարտել Իրանին անօդաչու թռչող սարքերի և հրթիռային հարձակումների համար։ Միացյալ Նահանգները հայտարարել է իր անսասան աջակցությունն Իսրայելին, Եվրամիությունը միջադեպն անվանել է «աննախադեպ էսկալացիա»: Մեծ Բրիտանիան հայտարարել է, որ Իրանը քաոս է սերմանում տարածաշրջանում, իսկ Գերմանիան հայտնել է «տարածաշրջանային հրդեհի» վտանգի մասին։
Գուտերեշը կոչ է արել անհապաղ դադարեցնել ռազմական գործողությունները և «խստորեն դատապարտել է լուրջ էսկալացիան, որը հարուցվել է Իսրայելի վրա Իրանի լայնածավալ հարձակման հետևանքով»։
«Կոչ եմ անում անհապաղ դադարեցնել այս ռազմական գործողությունները։ Ո՛չ տարածաշրջանը, ո՛չ աշխարհը չեն կարող իրենց թույլ տալ նոր պատերազմ», – գրել է նա X-ի իր էջում:
ԱՄՆ նախագահ Ջո Բայդենը վերահաստատել է Իսրայելին աջակցելու Վաշինգտոնի հանձնառությունը։
«Մեր հանձնառությունը՝ պաշտպանելու Իսրայելը Իրանի և նրա հետ կապված խմբավորումների սպառնալիքներից, անսասան է», – գրել է նա X սոցիալական ցանցում ազգային անվտանգության թիմի հետ հանդիպումից հետո:
ԵՄ դիվանագիտության ղեկավար Ժոզեպ Բորելը X սոցիալական ցանցում դատապարտել է Իրանի հարձակումը՝ այն անվանելով «աննախադեպ էսկալացիա»: Եվրոպական խորհրդի ղեկավար Շառլ Միշելը կոչ է արել ամեն ինչ անել Մերձավոր Արևելքում սրացումներից խուսափելու համար։
«Պետք է խուսափել մեծ արյունահեղությունից։ Մենք մեր գործընկերների հետ միասին կշարունակենք ուշադիր հետևել իրավիճակին»,- գրել է նա X-ում։
Մեծ Բրիտանիայի վարչապետն ասել է, որ Իրանը «ևս մեկ անգամ ցույց տվեց, որ մտադիր է ավերածություններ գործել իր հետնաբակում»: «Մեր դաշնակիցների հետ մենք շտապ կերպով աշխատում ենք իրավիճակը կայունացնելու և հետագա էսկալացիան կանխելու ուղղությամբ», – ասված է Մեծ Բրիտանիայի վարչապետի X-ում արված գրառման մեջ։
Գերմանիայի կանցլեր Օլաֆ Շոլցը վստահեցրել է, որ իր երկիրը «Իսրայելի կողքին է»։
«Մենք ամուր կանգնած ենք Իսրայելի կողքին և կսկսենք քննարկել մնացած ամեն ինչ մեր դաշնակիցների հետ»,- հավելել է կանցլերը:
Հիշեցնենք, որ Իրանը գիշերը Իսրայելի ուղղությամբ ավելի քան 200 ԱԹՍ ու հրթիռ է արձակել, որոնց մեծ մասը, Իսրայելի Պաշտպանության բանակի պնդմամբ՝ ոչնչացվել են։
Հիշեցնենք նաև, որ Իրանի Իսլամական հեղափոխության պահապանների կորպուսի (ԻՀՊԿ) երկու գեներալներ՝ Մոհամմադ Ռեզա Զահեդին և Մոհամմադ Հադի Հաջա Ռահիմին, զոհվել էին Սիրիայի մայրաքաղաք Դամասկոսում Իրանի հյուպատոսարանի մոտ ավիահարվածի հետևանքով, որը Թեհրանի պնդմամբ իրականացվել է Իսրայելի կողմից։
Ընդհանուր առմամբ, հարվածի հետևանքով զոհվել է 11 մարդ, ևս մի քանիսը վիրավորվել են։ Իրանի արտաքին գործերի նախարար Հոսեյն Ամիր Աբդոլլահիանը հայտարարել է, որ Թեհրանն Իսրայելին է պատասխանատու համարում հարձակման համար: Դամասկոսում Իրանի հյուպատոսության վրա հարվածը «բոլոր միջազգային կոնվենցիաների խախտում է», ասել է Աբդոլլահիանը։ Իսրայելական բանակը հայտարարել է, որ չի մեկնաբանում այս հայտարարությունները:
