30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Ռուսաստանից Նիգեր են մեկնել ռազմական հրահանգիչներ
Քաղաքականություն
12.04.2024 | 17:19
Ռուսաստանից ժամանած ռազմական հրահանգիչները սկսել են մարզել Նիգերի բանակը։ Ռազմական տեխնիկայով ինքնաթիռի բեռնաթափման կադրերը ցուցադրել է Նիգերի պետական RTN հեռուստաալիքը, փոխանցում է DW-ի ռուսական ծառայությունը:
«Մենք այստեղ ենք՝ մարզելու Նիգերի բանակը և ընդլայնելու Ռուսաստանի և Նիգերի միջև ռազմական համագործակցությունը»,- հեռուստաալիքի եթերում հայտարարել է զինվորական համազգեստով տղամարդը:
Հեռուստաալիքի տվյալներով՝ Ռուսաստանը համաձայնել է նաև Նիգերում հակաօդային պաշտպանության համակարգ տեղադրել։
Նիգերն աշխարհի ամենաաղքատ պետություններից է։ 2023 թվականին երկրում իշխանությունը զավթել է ռազմական խունտան։ Մինչ հեղաշրջումը, որի հետ կապի մեջ կասկածվում է Մոսկվան, Նիգերն արևմտյան պետությունների, ինչպիսիք են ԱՄՆ-ը, Ֆրանսիան և Գերմանիան, ամենակարևոր գործընկերներից մեկն էր Արևմտյան և Կենտրոնական Աֆրիկայում զինյալ իսլամիստների դեմ պայքարում: Երկար տարիներ Նիգերն ահաբեկում են տարբեր խմբավորումներ, որոնք կապված են Իսլամական պետության և Ալ-Քաիդայի հետ:
2023 թվականի հունվարին Նիգերը Մալիի և Բուրկինա Ֆասոյի հետ միասին դուրս է եկել ECOWAS տարածաշրջանային դաշինքից՝ Արևմտյան Աֆրիկայի Պետությունների Տնտեսական Համայնքից, որի հիմնական նպատակն էր ապահովել Արևմտյան Աֆրիկայում տարածաշրջանային անվտանգությունը:
