19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Թուրքիան հայտարարել է Իսրայել 54 խումբ ապրանքների արտահանման սահմանափակումների մասին
Քաղաքականություն
09.04.2024 | 15:17
Թուրքիան որոշել է 2024 թվականի ապրիլի 9-ից սահմանափակել որոշ ապրանքների արտահանումը Իսրայել, հայտնում է Թուրքիայի առևտրի նախարարության մամուլի ծառայությունը։
«Իսրայել արտահանման սահմանափակում» վերտառությամբ հայտարարության մեջ ասվում է, որ «Գազայի հատվածում Իսրայելի կողմից անմեղ պաղեստինցի ժողովրդի և քաղաքացիական բնակավայրերի անխտիր կոտորածի հետևանքով զոհված պաղեստինցիների թիվը գերազանցել է 33 հազարը, իսկ վիրավորներինը հարյուր հազարից ավելին է, նրանց մեծ մասը կանայք և երեխաներ են»։
«Այս որոշումն ուժի մեջ կմնա այնքան ժամանակ, քանի դեռ Իսրայելը, միջազգային իրավունքից բխող իր պարտավորությունների շրջանակում, անհապաղ հրադադար չհայտարարի Գազայում և թույլ տա մարդասիրական օգնության բավարար և անխափան հոսք Գազայի հատված։ Մեր երկիրը վաղուց թույլ չի տալիս Իսրայելին վաճառել որևէ ապրանք կամ ծառայություն, որը կարող է օգտագործվել ռազմական նպատակներով»,- ասվում է հայտարարության մեջ։
Թուրքիայի առևտրի նախարարության որոշումը Իսրայելի նկատմամբ սահմանափակումների վերաբերյալ առնչվում է ապրանքների 54 խմբի՝ ալյումին, պողպատ, ցեմենտ, մարմար, կերամիկա և այլն։
Գազայում հակամարտության ֆոնին՝ Անկարայի և Թել Ավիվի միջև առևտուրը, որը մասամբ ղեկավարում են Թուրքիայի նախագահ Ռեջեփ Թայիփ Էրդողանին մոտ կանգնած անձինք և ընկերությունները՝ չնայած նրա հակաիսրայելական հռետորաբանությանը, առաջին անգամ բացահայտվել էին թուրք լրագրողների կողմից նոյեմբերի վերջին։
Չնայած Գազայի հատվածում շարունակվող հակամարտությանը և Էրդողանի հնչեցրած կոշտ հայտարարություններին՝ Իսրայելը շարունակում է մնալ կարևոր առևտրային գործընկեր Թուրքիայի համար՝ 2023 թվականին զբաղեցնելով 13-րդ տեղը արտահանման ցանկում: Անցյալ տարի երկու երկրների միջև առևտրի ծավալը կազմել է 5,42 միլիարդ դոլար, ինչը Թուրքիայի ընդհանուր արտահանման 2,1 տոկոսն է։
Թուրքիայի տրանսպորտի նախարարության տվյալները ցույց են տալիս, որ 2023 թվականի հոկտեմբերի 7-ից դեկտեմբերի 31-ն ընկած ժամանակահատվածում օրական միջինը ութ նավ ընդհանուր 701 ուղևորություն է կատարել թուրքական նավահանգիստներից դեպի Իսրայել։ Դրանցից 480-ը նավարկել է ուղղակիորեն, իսկ 221-ը Թուրքիան օգտագործել է որպես տարանցիկ երկիր։ Ըստ թուրքական լրատվամիջոցների՝ փետրվարին Թուրքիայի առևտուրը Թել Ավիվի հետ աճել է 20,7 տոկոսով՝ հասնելով 422 միլիոն դոլարի։ Իսրայելի գյուղատնտեսության նախարարության տվյալները ցույց են տվել նաև, որ Հորդանանն ու Թուրքիան այն երկու երկրներն են, որոնք ամենից շատ միրգ ու բանջարեղեն են մատակարարել Իսրայել։
