Առանց ԱՄՆ-ի օգնության Ուկրաինան կպարտվի պատերազմում․ Զելենսկի

Ուկրաինայի նախագահ Վլադիմիր Զելենսկին զգուշացրել է Ռուսաստանի դեմ պատերազմում Կիևի պարտության հնարավորության մասին, եթե ԱՄՆ Կոնգրեսը հավանություն չտա ռազմական օգնության փաթեթին, գրում է DW-ի ռուսական ծառայությունը։

«Եթե Կոնգրեսը չօգնի Ուկրաինային, Ուկրաինան կպարտվի պատերազմում»,- հայտարարել է Զելենսկին United24 հարթակում տեսակոնֆերանսի ժամանակ։

Նա նշել է, որ առանց ԱՄՆ-ի աջակցության  դժվար կլինի հաղթել կամ նույնիսկ գոյատևել որպես երկիր։ Զելենսկին նաև զգուշացրել է՝ եթե Ուկրաինան պարտություն կրի, Ռուսաստանի Դաշնությունը կհարձակվի «մյուս պետությունների վրա»։

Ապրիլի 6-ի հարցազրույցում էլ Զելենսկին ասել էր, որ ուկրաինական բանակը զինամթերքի դեֆիցիտի պատճառով զրկված է Ռուսաստանի դեմ հակահարձակման հնարավորությունից։ Նա նաև ասել էր, որ Ուկրաինան 25 ամերիկյան Patriot ՀՕՊ համակարգերի կարիքն ունի՝ ՌԴ զանգվածային հարձակումներից օդը փակելու համար, մասնավորապես, Խարկովում, որը գտնվում է «ռուսական մշտական տեռորի թիրախում»։

Ուկրաինային ռազմական օգնության նոր ֆինանսավորման փաթեթը չի համաձայնեցվում ԱՄՆ Կոնգրեսում 2023 թվականի աշնանից ի վեր։ Փետրվարի 13-ին դեմոկրատների կողմից վերահսկվող ԱՄՆ խորհրդարանի վերին պալատը՝ Սենատը, հավանություն էր տվել Ուկրաինային, Իսրայելին և Թայվանին 95,3 միլիարդ դոլար օգնություն հատկացնելու օրինագծին։ Դրանից Կիևը պետք է ստանա 60,06 միլիարդ դոլար։ Բայց այն կարող է չհաստատվել Ներկայացուցիչների պալատում, որտեղ մեծամասնություն ունի Հանրապետական ​​կուսակցությունը։