24.02.2026 | 18:06
Դատարան է հանձնվել Սեյրան Օհանյանի կնոջ՝ Ռուզան Խաչատրյանի վերաբերյալ քրեական վարույթի նյութերը
Զապորոժիեի ԱԷԿ-ի ռեակտորի պաշտպանիչ պարկուճը վնասվել է․ ՄԱԳԱՏԷ
Քաղաքականություն
08.04.2024 | 11:03
Ատոմային էներգիայի միջազգային գործակալությունը (ՄԱԳԱՏԷ) հայտնել է, որ Զապորոժիեի ատոմակայանի ռեակտորի պաշտպանիչ պարկուճը վնասվել է անօդաչու թռչող սարքի հարվածի հետևանքով։ ՄԱԳԱՏԷ-ի ղեկավար Ռաֆայել Գրոսսին ասել է, որ հարձակման ժամանակ եղել է «առնվազն երեք ուղիղ հարված» պաշտպանիչ պարկուճին, գրում է Current Time-ը։
«2022 թվականի նոյեմբերին ես ուրվագծեցի ճառագայթաբանական հետևանքներով միջուկային լուրջ վթարի կանխարգելման հինգ հիմնական սկզբունքները․ դրանից հետո առաջին անգամ այսօր Զապորոժիեի ատոմակայանում աշխատող ՄԱԳԱՏԷ-ի տեսուչները հաստատել են, որ առնվազն երեք ուղիղ հարված է հասցվել ատոմակայանի գլխավոր ռեակտորի պաշտպանիչ պարկուճին»,- գրել է Գրոսսին։
Զապորոժիեի ատոմակայանը վերահսկվում է Ռուսաստանի իշխանությունների կողմից։ «Ռոսատոմը» ավելի վաղ հայտարարել էր, որ ապրիլի 7-ին ատոմակայանի վրա իրականացվել է «աննախադեպ հարձակումների շարք»։ Հաղորդվում էր, որ ժամը 11:38-ին հարված է հասցվել ճաշարանին հարող տարածքին, ապա անօդաչու սարքը հարվածել է բեռները փոխադրելու համար նախատեսված նավահանգստի տարածքին, ևս մեկ հարված ել եղել է ատոմակայանի վեցերորդ էներգաբլոկի գմբեթին։ «Ռոսատոմ»-ի տեղեկություններով՝ վիրավորվել է երեք աշխատակից, որոնցից մեկը՝ ծանր։
ՄԱԳԱՏԷ-ի փորձագետները հաստատել են Զապորոժիեի ԱԷԿ-ի վրա անօդաչու թռչող սարքերի հարձակումների հետևանքները, այդ թվում՝ վեց ռեակտորներից մեկին հասցված հարվածը, ասվում է կազմակերպության հաղորդագրության մեջ։ Հաղորդվել է նաև մեկ տուժածի մասին։
