07.12.2025 | 21:40
Վարդենյաց լեռնանցքում ձյուն է տեղում. Դիլիջանի, Սպիտակի ոլորաններում մառախուղ է
Շիրակի մարզում կատարվել է 13500 հա աշնանացան ցորենի ցանք, որը ձմեռացման ընթացքում վնասներ չի կրել
Տնտեսություն
05.04.2024 | 14:05
Գյուղատնտեսական աշխատանքների ընթացքում ոռոգման ջրի տրամադրման գործընթացն անխափան իրականացնելու նպատակով մարտի 1-ից Շիրակի մայր ջրանցքով Կառնուտի ջրամբարում կատարվել են ջրի կուտակման աշխատանքներ։ Նախորդ տարվա նույն ժամանակահատվածի համեմատ Կառնուտի ջրամբարում այս տարի ավելի շատ ջուր է կուտակվել։ Ինչպես տեղեկացնում են Շիրակի մարզպետարանից, մարզում ընթացքի մեջ են գարնան գյուղատնտեսական աշխատանքները։
Շիրակի մարզպետարանի Գյուղատնտեսության և շրջակա միջավայրի պահպանության վարչության պետ Ռոման Համայակյանի խոսքով՝ մարզում կատարվել է 13500 հա աշնանացան ցորենի ցանք, որը ձմեռացման ընթացքում վնասներ չի կրել: ՀՀ կառավարության որոշմամբ հաստատված «Բուսաբուծության աջակցության ծրագիրը» կնպաստի գարնանացանի ցանքատարածությունների ավելացմանը։
Նշված ծրագիրն անխափան իրականացնելու համար արդեն իսկ կազմակերպվել են քննարկումներ ՀՀ էկոնոմիկայի նախարարության և համայնքապետարանների միջև։ Ծրագրով հացահատիկային մշակաբույսերի մշակության յուրաքանչյուր 1 հեկտար մակերեսի հաշվով տրամադրվելու է 70 հազար դրամ, եգիպտացորենի մշակության յուրաքանչյուր 1 հեկտար մակերեսի հաշվով՝ 85 հազար դրամ, հատիկաընդեղեն մշակաբույսերի մշակության ամեն հեկտարի համար՝ 100 հազար դրամ, իսկ բազմամյա խոտաբույսերի դեպքում՝ 110 հազար դրամ:
