23.02.2026 | 17:07
Ռուսաստանի դեմ ԵՄ պատժամիջոցների 20-րդ փաթեթը երկուշաբթի օրը չի համաձայնեցվի. Կալաս
Եվրոպան ցանկանում է տարածաշրջանում պատերազմ հրահրել․ Ադրբեջանի Մեջլիսի պատգամավորները՝ ՀՀ–ԵՄ-ԱՄՆ հանդիպման մասին
Քաղաքականություն
05.04.2024 | 14:18
Ադրբեջանի Միլլի Մեջլիսի այսօրվա նիստում ադրբեջանցի պատգամավորներն անդրադարձել են Բրյուսելում կայանալիք ՀՀ-ԱՄՆ-ԵՄ եռակողմ հանդիպմանը։ Պատգամավոր Սիյավուշ Նովրուզովն այս համատեքստում խոսել է Իրանի մասին։
«Ինձ մտահոգում է Իրանի լռությունը: 44-օրյա պատերազմի ժամանակ Իրանն ամեն օր հայտարարություններ էր անում, այսօր այս երկիրը որևէ վերաբերմունք չի արտահայտում տեղի ունեցողի հետ կապված: Օրերս Իրանի խորհրդարանի պատգամավորներից մեկը կոչ արեց հարձակվել Ադրբեջանում Իսրայելի դեսպանատան վրա։ Փորձեք, եթե համարձակություն ունեք, սպառնալ դեսպանատներին Ամերիկայում կամ Ռուսաստանում»,- ասել է Նովրուզովը։
Մեջլիսի փոխխոսնակ Ֆազաիլ Իբրահիմլին էլ հայտարարել է, թե Եվրոպան ցանկանում է տարածաշրջանում պատերազմ հրահրել։
«Ինչո՞ւ են այս փորձերը, պատասխանը շատ պարզ է՝ Ռուսաստանի համար երկրորդ ճակատի բացում։ Այն, ինչ եղավ Ուկրաինայում, Ռուսաստանի դեմ կիրառված պատժամիջոցները ոչ մի արդյունք չտվեցին»,- ասել է պատգամավորը։
Մեկ այլ պատգամավոր՝ Էլման Նասիրովն էլ հայտարարել է, որ «այսօր Բրյուսելում նախատեսված եռակողմ հանդիպումը լրջորեն կանդրադառնա տարածաշրջանի գործընթացների վրա»։ Նա հույս է հայտնել, որ Ադրբեջանի դեմ որոշում չի կայացվի։
Պատգամավոր Քյամալ Ջաֆարովն իր հերթին հայտարարել է, թե «Հայաստանն ու Ադրբեջանն այժմ ավելի, քան երբևէ մոտ են խաղաղությանը, սակայն ԱՄՆ-ի, Եվրամիության և Հայաստանի այսօրվա հանդիպումը ցույց է տալիս, որ Արևմուտքն անկեղծ չէ տարածաշրջանում խաղաղության հարցում և փորձում է նոր բաժանարար գծեր և ազդեցության շրջանակներ ստեղծել տարածաշրջանում»։
Նշենք, որ Բրյուսելում ՀՀ վարչապետ Նիկոլ Փաշինյանի, ԱՄՆ պետքարտուղար Էնթոնի Բլինքենի ու Եվրահանձնաժողովի նախագահ Ուրսուլա ֆոն դեր Լեյենի հանդիպումը մեկնարկելու է Երևանի ժամանակով 14:00-ին։
Էմմա Չոբանյան
