Քաղաքականություն
04.04.2024 | 13:06
Ադրբեջանը Ռուսաստանի կարևոր ռազմավարական գործընկերն է, լավ հարևանն ու հուսալի դաշնակիցը։ Այս մասին ասվում է Բաքվում ՌԴ դեսպանատան հայտարարության մեջ՝ երկու երկրների միջև դիվանագիտական հարաբերությունների հաստատման 32-ամյակի կապակցությամբ, փոխանցում են ադրբեջանական լրատվամիջոցները։
«Երկու երկրների հարաբերությունները հիմքում հավասարության և բարիդրացիության սկզբունքներն են, բարեկամության և փոխադարձ հարգանքի դարավոր ավանդույթները։ Պետությունների միջև փոխգործակցության զարգացումը նպաստում է Հարավային Կովկասում և Կասպից ծովի տարածաշրջանում կայունության ու անվտանգության ամրապնդմանը»,- նշվում է հայտարարության մեջ։
ՌԴ դեսպանատունն ընդգծել է, որ համագործակցության հիմքը 200-ից ավելի միջպետական, միջկառավարական, միջգերատեսչական և միջտարածաշրջանային պայմանագրերն ու համաձայնագրերն են։
«Ռուսաստանի Դաշնության և Ադրբեջանի Հանրապետության միջև դաշնակցային համագործակցության մասին հռչակագիրը, որը ստորագրվել է Մոսկվայում 2022 թվականի փետրվարի 22-ին, երկկողմ հարաբերությունները նոր որակական մակարդակի են հասցրել»,- նշում է դիվանագիտական ներկայացուցչությունը։
Դեսպանությունն ընդգծում է, որ քաղաքական երկխոսությունն ակտիվորեն զարգանում է ամենաբարձր մակարդակով՝ ԱԳՆ-ների, առանցքային գերատեսչությունների ղեկավարների, ինչպես նաև խորհրդարանական մակարդակով։ Հաջողությամբ զարգանում է նաև առևտրատնտեսական համագործակցությունը։
«Երկկողմ ապրանքաշրջանառությունը 2023 թվականին աճել է 17,5 տոկոսով։ Ռուսաստանը շարունակում է մնալ Ադրբեջանի առաջատար առևտրատնտեսական գործընկերներից մեկը։ Ադրբեջանում ռուսական մասնակցությամբ տարբեր ներդրումային նախագծեր են իրականացվում։ Գործարար համայնքների միջև շփումներն ընդլայնվում են, այդ թվում՝ փոքր և միջին բիզնեսի միջոցով։ Երկկողմ համագործակցության կարևոր տարր է Տնտեսական համագործակցության միջկառավարական հանձնաժողովը»,- հայտարարում է Բաքվում ՌԴ դեսպանատունը՝ նշելով, որ կա երկուստեք շահագրգռվածություն ռազմավարական գործընկերության և դաշնակցության հետագա զարգացման հարցում։
