07.10.2026 | 21:38
Ովքեր են ղեկավարում Սյունիքի համայնքները․ քաղաքական անցյալ, բիզնես կապեր և քրեական վարույթներ
ԱՄՆ-ը ներգրավված չէ Դամասկոսում Իրանի դեսպանատան վրա հարվածի գործում. Սպիտակ տուն
Քաղաքականություն
03.04.2024 | 14:00
ԱՄՆ-ը հայտարարել է, որ կապ չունի Սիրիայի մայրաքաղաքում Իրանի դեսպանատանն իսրայելական ավիահարվածի հետ, որի հետևանքով զոհվել են երկու իրանցի գեներալներ և հինգ ռազմական խորհրդականներ:
Սպիտակ տան Ազգային անվտանգության խորհրդի խոսնակ Ջոն Քիրբին «անհեթեթություն» է որարկել Թեհրանի կողմից հրթիռային հարվածի համար ամերիկյան կողմին մեղադրելը և նախազգուշացրել, որ Վաշինգտոնը պատասխան հարված կհասցնի ցանկացած պատասխան գործողության:
«Թույլ տվեք պարզաբանել. մենք կապ չունենք Դամասկոսի հարվածների հետ։ Մենք որևէ կերպ ներգրավված չենք եղել դրանում»,- ասել է նա ճեպազրույցում:
VOA-ն նշում է, որ Դամասկոսին հասցված հարվածը սպառնում է սաստկացնել Իսրայելի ու Իրանի, ինչպես նաև Թեհրանի կողմից աջակցվող խմբավորումների միջև երկարամյա մարտերը: Այս հակամարտությունը սրվել է հոկտեմբերին Իսրայելի ու իրանամետ ՀԱՄԱՍ իսլամիստական խմբավորման միջև Գազայի հատվածում սկսված ռազմական գործողություններից հետո։
Իրանը հայտարարել էր, որ կպատասխանի իսրայելական հարվածին, որը ոչնչացրեց Իրանի դեսպանատան հյուպատոսական բաժինը և սպանեց Իսլամական հեղափոխության պահապանների կորպուսի՝ «Կուդս» էլիտար ստորաբաժանման 7 աշխատակիցներին, որն արտաքին ռազմական և հետախուզական գործողություններ է իրականացնում Իրանի սահմաններից դուրս:
Իսրայելը չի ստանձնել հարձակման պատասխանատվությունը։
