Իսրայելում հակակառավարական բողոքի ցույցեր են սկսվել

Տասնյակ հազարավոր իսրայելցիներ կիրակի օրը՝ մարտի 31-ին, կրկին դուրս են եկել փողոց՝ բողոքելու կառավարության քաղաքականության դեմ, որը գլխավորում է աջ պահպանողական վարչապետ Բենիամին Նեթանյահուն։  Ակցիան անցկացվել է Երուսաղեմում՝ խորհրդարանի շենքի մոտ, գրում է DW-ի ռուսական ծառայությունը։
Ցուցարարները պահանջել են կառավարության հրաժարականը և արտահերթ ընտրություններ, ինչպես նաև գործարքի շուտափույթ կնքում՝ ՀԱՄԱՍ-ի գրոհայինների կողմից պատանդների ազատ արձակման համար։ Երուսաղեմում այս բողոքի ցույցը դարձել է ամենամեծը Գազայի հատվածում պատերազմի մեկնարկից ի վեր։ Կազմակերպիչները պնդում են, որ Կնեսետի մոտ հավաքվել է ավելի քան 100 հազար մարդ, մինչդեռ լրատվամիջոցները գրում են տասնյակ հազարավոր մասնակիցների մասին։
Իսրայելի ընդդիմության առաջնորդ Յաիր Լապիդը, ելույթ ունենալով ցույցի ժամանակ, կտրուկ քննադատել է Նեթանյահուին՝ մեղադրելով ԱՄՆ-ի հետ հարաբերությունները փչացնելումեջ։ «Նեթանյահուն ամեն ինչ անում է քաղաքականության համար և ոչինչ երկրի համար», – ասել է Լապիդը:
Իսրայելի վարչապետն արձագանքելով ընդդիմության պահանջին՝ հայտարարել է, որ չի պատրաստվում հրաժարական տալ։  «Ընտրությունների կոչերը հիմա՝ պատերազմի թեժ փուլում, հաղթանակից մի քանի րոպե առաջ, կաթվածահար կանեն Իսրայելն առնվազն վեց ամսով, իսկ իմ գնահատմամբ՝ նույնիսկ ութ ամսով»,- ասել է Նեթանյահուն։
Ըստ նրա՝ արտահերթ ընտրությունները կխանգարեն նաև պատանդների ազատ արձակման բանակցություններին: Նեթանյահուն խոստացել է բոլոր պատանդներին տուն վերադարձնել։