Բաքուն պարզաբանել է, թե ինչու Արայիկ Հարությունյանի հետ հարցազրույցը չի ցուցադրել

Ադրբեջանի պետական AzTV հեռուստաալիքը ծրագրում էր մարտի 28-ին հեռարձակել ապօրինաբար Բաքվի բանտում պահվող Արցախի նախկին նախագահ Արայիկ Հարությունյանի հետ միջազգային նորմերի խախտմամբ արված հարցազրույցը։ Հեռուստաալքիը հարցազրույցի մասին հայտնել էր դեռևս մարտի սկզբին, սակայն նախօրեին այն չի ցուցադրվել։

AzTV-ի խոսնակ Ռուֆաթ Սեիդովն ասել է, որ թեև նախապես հայտարարվել էր, որ հարցազրույցը հեռարձակվելու է մարտի 28-ին, տեղեկությունը հետագայում հեռացրել են AzTV-ի սոցցանցերի էջերից։

«Հարցազրույցի հեռարձակումը միայն մեզանից չէ կախված։ Մենք բախվել են հարցի՝ արդյո՞ք նպատակահարմար է այն հիմա ցուցադրել։ Երեկ մենք չենք էլ հայտարարել, որ հարցազրույցը երեկոյան եթերում ցուցադրվելու է։ Ճիշտ է, մարտի սկզբին մենք անոնսը տվել ենք, սակայն ավելի ուշ պարզվեց, որ անհրաժեշտ են որոշ ճշգրտումներ հարցազրույցի հրապարակման հետ կապված։ Հետևաբար, հեռուստադիտողներին շփոթեցնելուց խուսափելու համար մենք հեռացրել ենք այդ գովազդները մեր բոլոր սոցիալական հաշիվներից: Երեկ կայքերում և սոցիալական ցանցերում տարածված տեղեկատվությունը, ըստ էության, հղում էր մարտի սկզբին արված հայտարարությանը, որը ջնջվել է»,- ասել է նա։

Միաժամանակ, Սեիդովը նշել է, որ հարցազրույցն ամեն դեպքում հեռարձակվելու է։

«Այն անպայման կցուցադրվի, սակայն պարզ չէ, թե երբ։ Երբ հայտնի լինի, կհայտնենք հարցազրույցի օրվա մասին»,- ասել է նա։

Հավելենք, որ AzTV-ն հարցազրույց է անցկացրել նաև Բաքվի  բանտում ապօրինի պահվող Արցախի ՊԲ նախկին հրամանատար Լևոն Մնացականյանի հետ։

Էմմա Չոբանյան