23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
Պուտինը կհրավիրվի G20-ին միայն ընդհանուր համաձայնության դեպքում․ Մակրոն
Քաղաքականություն
29.03.2024 | 12:58
ՌԴ նախագահ Վլադիմիր Պուտինը կարող է հրավիրվել նոյեմբերին Բրազիլիայում կայանալիք G20-ի գագաթնաժողովին միայն այն դեպքում, եթե դրան համաձայնեն բոլոր մասնակից երկրները։ Այս մասին Բրազիլիա կատարած այցի ժամանակ հայտարարել է Ֆրանսիայի նախագահ Էմանուել Մակրոնը երկրի նախագահ Լուիս Ինասիո Լուլա դա Սիլվայի հետ համատեղ մամուլի ասուլիսում, գրում է DW-ի ռուսական ծառայությունը։
Ըստ Մակրոնի՝ քսան արդյունաբերական և զարգացող երկրների միավորման իմաստն այն է, որ «մյուս 19 երկրների հետ պետք է կոնսենսուս ձեռք բերել, դա լինելու է բրազիլական դիվանագիտության խնդիրը»։ Նա ասել է, որ Մեծ քսանյակը պարտավոր է գործել «խաղաղության և ընդհանուր շահերի գործին ծառայելու համար»։
«Եթե հանդիպումը կարող է օգուտ բերել, ապա այն պետք է անցկացվի, եթե այն օգտակար չէ և կհանգեցնի տարաձայնությունների, այն չպետք է անցկացվի»,- ասել է Մակրոնը։
Նա հիշեցրել է, որ հրաժարվել է Պուտինին 2019 թվականի օգոստոսին Ֆրանսիայում կայանալիք G7-ի գագաթնաժողովին հրավիրելու մտքից հենց Յոթնյակի խմբում այս հարցում կոնսենսուսի բացակայության պատճառով՝ փոխարենը կազմակերպելով առանձին հանդիպում Ռուսաստանի նախագահի հետ։
Ուկրաինա ռուսական լայնամասշտաբ ներխուժման մեկնարկից ի վեր G20-ի յուրաքանչյուր գագաթնաժողովից առաջ հարց է ծագում՝ արդյո՞ք Վլադիմիր Պուտինը, որի կալանավորման օրդեր է տվել Միջազգային քրեական դատարանը, կմասնակցի դրան: Արդյունքում Պուտինը չի մասնակցել 2022 թվականին Ինդոնեզիայի և 2023 թվականին Հնդկաստանի գագաթնաժողովներին։ Նույն պատճառով 2023 թվականի օգոստոսին Պուտինը չի մասնակցել նաև Հարավային Աֆրիկայում BRICS-ի գագաթնաժողովին։
Բրազիլիայի նախագահը 2023 թվականի սեպտեմբերին ասել էր, որ Պուտինին կհրավիրի 2024 թվականին Ռիո դե Ժանեյրոյում կայանալիք G20 գագաթնաժողովին՝ վստահեցնելով նրա այցի անվտանգության հարցում։ Սակայն նույն տարվա դեկտեմբերին նա այլ հայտարարություն է արել՝ ասելով, որ պատրաստ չէ անվտանգության երաշխիքներ տրամադրել։
