25.06.2026 | 09:33
ՀՀ տարածքում ավտոճանապարհներն անցանելի են
Թուրքիան պատրաստվում է մեծացնել պայթուցիկների արտադրությունը՝ Ուկրաինային արկեր մատակարարելու համար․ Bloomberg
Քաղաքականություն
28.03.2024 | 18:09
ԱՄՆ-ը Թուրքիային խնդրել է մեծացնել ՆԱՏՕ-ին 155 մմ տրամագծի զինամթերքի արտադրության համար պայթուցիկների մատակարարումը, որն Ուկրաինային շտապ անհրաժեշտ է, Bloomberg-ին հայտնել են հարցի քննարկմանը ծանոթ աղբյուրները։
Նրանց կարծիքով՝ պայթուցիկ նյութերի թուրքական մատակարարումները կարող են պոտենցիալ եռապատկել արկերի արտադրությունը։
ԱՄՆ-ի և Թուրքիայի միջև արդեն իսկ հաստատվել են ռազմական կապեր, հիշեցնում է Bloomberg-ը։ Նախկինում Պենտագոնը պայմանագիր էր կնքել թուրքական Arca Defence պաշտպանական ընկերության հետ՝ այս տարի 116 հազար միավոր զինամթերք մատակարարելու համար։ Repkon-ը նաև արկեր կարտադրի ԱՄՆ-ի համար։ Ակնկալվում է, որ մինչև 2025 թվականը դրա ձեռնարկությունները կարտադրեն ամերիկյան արտադրության 155 մմ տրամաչափի ամբողջ զինամթերքի 30%-ը։ Մինչ այս ժամկետը ԱՄՆ-ը նախատեսում է ՆԱՏՕ-ի տրամաչափի արկերի արտադրությունը հասցնել ամսական 100 հազարի։
Միևնույն ժամանակ, ԱՄՆ-ն աշնանից ի վեր չի կարողացել համաձայնության գալ Ուկրաինային 61,4 մլրդ դոլարի հավելյալ օգնության տրամադրման շուրջ։ Պենտագոնը նախազգուշացրել է, որ առանց այդ օգնության ուկրաինական բանակը ստիպված կլինի լքել իր դիրքերը։
Ներկայում ԱՄՆ-ն ու ԵՄ-ն կարող են Ուկրաինային տարեկան մատակարարել ոչ ավելի, քան 1,2 միլիոն արկ, մինչդեռ Ռուսաստանն ամսական արտադրում է մոտ 250 հազար հրետանային զինամթերք, ՆԱՏՕ-ի երկրների հետախուզական գնահատականներն է վկայակոչում CNN-ը։
Առայժմ ռեսուրսների ընդհանուր հավասարակշռությունը Ռուսաստանին առավելություն է տալիս մարտի դաշտում, սակայն ԱՄՆ-ի օգնության տրամադրումը կարող է ազդել իրավիճակի վրա։ Մարտի սկզբին Ուկրաինայի արևմտյան դաշնակիցներն անհրաժեշտ միջոցներ են հավաքել Ուկրաինայի զինված ուժերի համար 800 հազար արկ գնելու նպատակով։ Այս զինամթերքը կարող է առաջնագծում լինել արդեն մարտ-ապրիլ ամիսներին, գրում է Bloomberg-ը։
