24.02.2026 | 22:17
Պուտինը պնդում է՝ «Թուրքական հոսք» և «Կապույտ հոսք» գազատարները փորձում են պայթեցնել
ՌԴ ԱԴԾ-ն խոստովանել է՝ ԱՄՆ-ը նախազգուշացրել է Մոսկվային ծրագրվող ահաբեկչության մասին
Քաղաքականություն
26.03.2024 | 20:46
ԱՄՆ հետախուզական ծառայություններն իսկապես զգուշացրել են Մոսկվային, որ Ռուսաստանում ահաբեկչություն է նախապատրաստվում, սակայն այդ տեղեկությունն ընդհանուր բնույթ է կրել։ Այս մասին հայտարարել է ԱԴԾ տնօրեն Ալեքսանդր Բորտնիկովը, գրում է Մեդուզան։
«Դա ընդհանուր բնույթի տեղեկատվություն է մարդաշատ վայրերում ահաբեկչություն նախապատրաստելու մասին։ Մենք արձագանքեցինք այս տեղեկատվությանը և, բնականաբար, համապատասխան միջոցներ ձեռնարկեցինք՝ կանխելու նման դրսևորումը։ Ցավոք, մեր գործողությունները, որ իրականացրել ենք կոնկրետ խմբերի և կոնկրետ անձանց հետ կապված, այդ տեղեկությունն այն ժամանակ չհաստատեցին»,- լրագրողներին ասել է նա։
ԱԴԾ-ի ղեկավարի խոսքով՝ տեղեկություններ կային, որ ահաբեկչությունը ծրագրվել է ոչ թե համերգի, այլ նախագահական ընտրությունների ժամանակ։
«Այժմ տեղի ունեցածը, ցավոք, հաջորդ հարձակումն է»,- եզրափակել է նա:
Մարտի 7-ին մի շարք երկրների, այդ թվում՝ ԱՄՆ-ի, Կանադայի, Գերմանիայի, Չեխիայի, Շվեդիայի, Լատվիայի և Հարավային Կորեայի դեսպանատները զգուշացրել են իրենց քաղաքացիներին, որ առաջիկա երկու օրերին Մոսկվայում կարող է ահաբեկչություն տեղի ունենալ։
Նույն օրը ԱԴԾ-ն հայտարարեց Մոսկվայի սինագոգի վրա ահաբեկչական հարձակումը կանխելու մասին, որը, իբր, նախապատրաստել էին Աֆղանստանում ԻԼԻՊ-ի բջիջ հանդիսացող՝ «Վիլայաթ Խորասանի» գրոհայինները (նույն խումբը համարվում է «Կրոկուս սիթի հոլլում» տեղի ունեցած ահաբեկչական հարձակման հեղինակը)։ Ղազախստանի երկու քաղաքացիներ կասկածվում էին Մոսկվայի սինագոգի վրա հարձակում նախապատրաստելու մեջ։
Մարտի 22-ին «Կրոկուսում» տեղի ունեցած ահաբեկչությունից հետո լրատվամիջոցները, հղում անելով իրենց աղբյուրներին, գրում էին, որ ԱՄՆ-ը Ռուսաստանի հետ կիսվել է ահաբեկչական հարձակումների սպառնալիքի մասին հաղորդագրություններով։
