Իրավապաշտպանները դատապարտում են ահաբեկչության մեջ կասկածվող անձանց խոշտանգումները

«Ընդդեմ խոշտանգումների թիմ» իրավապաշտպան ասոցիացիան այսօր հայտարարություն է տարածել՝ դատապարտելով ռուսական անվտանգության ուժերի բռնությունը «Կրոկուս սիթի հոլլում» տեղի ունեցած ահաբեկչության մեջ կասկածվողների նկատմամբ։ Փաստաթղթում նշվում է, որ կալանավորները բերման են ենթարկվել դատարանի դահլիճ, որտեղ նրանց նկատմամբ խափանման միջոց է ընտրվել խոշտանգման տեսանելի նշաններով՝ «կտրված ականջով, վնասված պարանոցով և անգիտակից վիճակում», փոխանցում է DW-ի ռուսական ծառայությունը։

Իրավապաշտպանները հիշեցրել են, որ «խոշտանգումների զոհերը հաճախ կեղծ տեղեկություններ են տալիս՝ բռնությունը գոնե ժամանակավորապես դադարեցնելու համար», հետևաբար, այս կերպ ձեռք բերված ցուցմունքների արժեքը «չափազանց ցածր է»:

Փաստաթղթում ուշադրություն է հրավիրվում նաև այն փաստի վրա, որ հրապարակվել են կալանավորների խոշտանգումների փաստերը։

«Մենք ականատես եղանք ոչ միայն հրեշավոր ահաբեկչության, այլև հանրային խոշտանգումների. սա մարդկանց վախով կաթվածահար անելու և ողջ հասարակությանը բռնության անուղղակի զոհ դարձնելու միջոց է։ Բարբարոսության պատասխանը չպետք է լինի բարբարոսությունը»,- ասվում է հայտարարությունում։

Մերձմոսկովյան Կրասնոգորսկ քաղաքում գտնվող առևտրի կենտրոնում հարձակումը տեղի է ունեցել մարտի 22-ի երեկոյան։ Վերջին տվյալներով՝ զոհվել է 137, վիրավորվել՝ 182 մարդ։ ԱԴԾ-ն հայտնել է, որ գործի շրջանակում կալանավորվել է 11 մարդ, այդ թվում՝ չորս անմիջական հանցագործները՝ Տաջիկստանի քաղաքացիներ։ Բասմանի դատարանը նրանց նկատմամբ որպես խափանման միջոց է ընտրել կալանավորումը երկու ամիս ժամկետով՝ մինչև մայիսի 22-ը։

Լրատվամիջոցներում և Telegram ալիքներում հրապարակված ֆոտո և վիդեո նյութերի համաձայն՝ ձերբակալությունից հետո կասկածյալները ենթարկվել են էլեկտրաշոկով խոշտանգումների, ուժայինները կտրել են նրանցից մեկի ականջը և ստիպել ուտել այն, ևս մեկ հնարավոր ահաբեկիչ դատարանի դահլիճ է բերվել ինտենսիվ թերապիայի բաժանմունքից։

Կասկածյալների խոշտանգումների վերաբերյալ լրագրողները հարցրել են ՌԴ նախագահի մամուլի քարտուղար Դմիտրի Պեսկովին։

«Այս հարցը թողնում եմ անպատասխան»,- ասել է ռուս պաշտոնյան։