Կրեմլը հրաժարվել է մեկնաբանել «Կրոկուս»-ում հարձակմանը ԻԼԻՊ-ի մասնակցությունը

ՌԴ նախագահի մամուլի խոսնակ Դմիտրի Պեսկովը հրաժարվել է մեկնաբանել վարկածը, որ ԻԼԻՊ-ը  (Ռուսաստանում և բազմաթիվ այլ երկրներում արգելված կազմակերպություն), որը ստանձնել է հարձակման պատասխանատվությունը, ներգրավված է եղել «Կրոկուսի Սիթի հոլլ» համերգասրահի վրա հարձակման գործում, գրում է BBC-ի ռուսական ծառայությունը։

«Դուք հարց եք տալիս, որը կապված է նախաքննության ընթացքի հետ։ Մենք դա որևէ կերպ չենք մեկնաբանում, իրավունք չունենք։ Կոչ ենք անում հիմնվել մեր իրավապահ մարմիններից ստացվող տեղեկատվության վրա»,- ասել է Պեսկովը:

Կրեմլի ներկայացուցիչը նաև չի մեկնաբանել դատարան բերված կասկածյալների մարմինների վրա «բռնության տեսանելի նշանները»՝ կապտուկներն ու վերքերը։

«Ես այդ հարցն անպատասխան եմ թողնում»,- ասել է Պեսկովը։

Ռուսական սոցցանցերում տեսանյութ է տարածվել, որտեղ, իբր, երևում է ձերբակալվածներից մեկի նախնական հարցաքննությունը, որտեղ նրա ականջը կտրել են։ Մարտի 24-ին անանուն տելեգրամյան ալիքներում էլ հրապարակվել էր մի տեսանյութ, որտեղ, ենթադրաբար, պատկերված է, թե ինչպես են ձերբակալվածներից մեկին էլեկտրաշոկով խոշտանգում։

Պատասխանելով հարցին՝ արդյո՞ք ԱՄՆ-ը նախազգուշացրել է Ռուսաստանին պատրաստվող հարձակման մասին, Պեսկովն ասել է․ «Հետախուզական տվյալներ երբեք չեն տրամադրվում Կրեմլին, դրանք տրամադրվում են հետախուզական ծառայություններին՝ հատուկ ծառայությունից հատուկ ծառայությանը: Սա մտնում է զգայուն տեղեկատվության կատեգորիայի մեջ, որը, իհարկե, չի բացահայտվում»։