Ռուս զինվորականները «Շահեդ»-ներով հարվածել են Օդեսային. քաղաքի մի մասը մնացել է առանց էլեկտրականության

Մարտի 25-ի գիշերը ռուս զինվորականները «Շահեդ»-ներով հարվածներ են հասցրել Օդեսային։ Քաղաքում չեն գործում էլեկտրական տրանսպորտն ու որոշ մանկապարտեզներ։ Այս մասին հայտնում են տեղի իշխանությունները, գրում է Current Time-ը։

Անօդաչու թռչող սարքի գրոհից հետո շրջանային վարչակազմի ղեկավար Օլեգ Կիպերը հայտարարել է «էներգետիկ ենթակառուցվածքի վնասման մասին», ինչի հետևանքով Օդեսայի մի մասը մնացել է առանց էլեկտրաէներգիայի։ Երկուշաբթի քաղաքում չեն գործի տրամվայներն ու տրոլեյբուսները, հայտարարել է Օդեսայի քաղաքապետարանը։ Իսկ այն մանկապարտեզները, որտեղ մինչև մարտի 25-ի առավոտ էլեկտրականություն չի եղել, երեխաներին կընդունեն հերթապահ խմբերով։

Ավելի ուշ Ուկրէներգո ընկերությունը հաղորդել է Օդեսայում և տարածաշրջանում երկու էլեկտրական ենթակայանների վրա հարձակումների մասին:

«Օդեսայում և Օդեսայի մարզում սարքավորումների վնասման պատճառով էներգետիկները ստիպված են մեծացնել սպառման սահմանափակման ժամկետները: Դա անհրաժեշտ է՝ գործող սարքավորումները գերբեռնվածությունից պաշտպանելու համար», – գրում է Ուկրէներգոն:

Ուկրաինայի հարավի պաշտպանական ուժերը հայտնում են, որ Նիկոլաևի և Օդեսայի շրջաններում չորս «Շահեդ» է կործանվել։ Նիկոլաևում վնասվել է էներգետիկ օբյեկտ և բնակելի շենք։

«Հնարավոր չէր խուսափել հարվածից, Նիկոլաևի շրջանում հակառակորդը խոցել է էներգաօբյեկտը, բռնկվել է հրդեհ, որն արագորեն մարվել է հրշեջների կողմից»,- գրում է Ուկրաինայի հարավի ՊԲ մամուլի ծառայությունը։

Նիկոլաևում երկհարկանի բնակելի շենքի վրա անօդաչու թռչող սարքի բեկորների ընկնելու հետևանքով տուժել է 11 մարդ, նրանցից երկուսը հոսպիտալացվել են։ Զինվորականները չեն նշում, թե քանի անօդաչու թռչող սարք է հարձակվել Ուկրաինայի տարածքի վրա։