07.10.2026 | 10:00
Ազգային ժողովի նիստը՝ ՈՒՂԻՂ
ԵՄ-ն Նավալնիի մահվան կապակցությամբ անձնական պատժամիջոցներ է սահմանել 33 մարդու նկատմամբ
Քաղաքականություն
22.03.2024 | 19:15
Եվրոպական խորհուրդը հաստատել է պատժամիջոցները՝ կապված գաղութում ռուս ընդդիմադիր գործիչ Ալեքսեյ Նավալնիի մահվան հետ։ Դրանք սահմանվել են 33 ֆիզիկական և 2 իրավաբանական անձանց նկատմամբ՝ կապված մարդու իրավունքների խախտումների հետ։ Եվրամիությունում նրանց ակտիվները հայտնաբերվելու դեպքում ենթակա են սառեցման, իսկ ցուցակում հայտնվածներին արգելվում է մուտք գործել ԵՄ։
«Կրեմլի ռեժիմի կողմից Ալեքսեյ Նավալնիի դանդաղ սպանությունը վառ հիշեցում է մարդկային կյանքի նկատմամբ նրանց լիակատար անտեսման մասին: Այսօրվա պատժամիջոցները ցույց են տալիս մեր վճռականությունը՝ պատասխանատվության ենթարկելու Ռուսաստանի քաղաքական ղեկավարությանը և իշխանություններին երկրում մարդու իրավունքների շարունակվող խախտումների համար: Միևնույն ժամանակ, մենք գիտենք, որ Պուտինը Ռուսաստան չէ, և Ռուսաստանը Պուտին չէ։ Մենք կշարունակենք աջակցել Ռուսաստանի քաղաքացիական հասարակությանը և անկախ ձայներին»,- ասել է եվրոպական դիվանագիտության ղեկավար Ժոզեպ Բորելը:
Պատժամիջոցների տակ են հայտնվել թիվ 3 «Բևեռային գայլ» ուղղիչ գաղութը Խարպում՝ Յամալո-Նենեց ինքնավար օկրուգում և Վլադիմիրի շրջանի Մելեխովոյում գտնվող թիվ 6 գաղութը: ԵՄ խորհրդի որոշման մեջ ասվում է, որ երկու գաղութներն էլ «հայտնի են ֆիզիկական և հոգեբանական ճնշումներով, լիակատար մեկուսացմամբ, խոշտանգումներով և բանտարկյալների նկատմամբ բռնություններով»:
Պատժամիջոցների ցանկում են նաև ՌԴ արդարադատության փոխնախարար Վսևոլոդ Վուկոլովը, Մոսկվայի դաշնային քրեակատարողական ծառայության պետ Սերգեյ Մորոզը և դաշնային քրեակատարողական ծառայության ղեկավարի առաջին տեղակալ Վալերի Բոյարինևը (որին Վլադիմիր Պուտինը Նավալնիի մահից երեք օր անց շնորհել է գեներալ-գնդապետի կոչում):
Պատժամիջոցների տակ են հայտնվել գաղութների ղեկավարներն ու աշխատակիցները, ինչպես նաև դատավորները, որոնք տարիների ընթացքում որոշումներ են կայացրել Նավալնիի գործերի վերաբերյալ։ Խոսքը, մասնավորապես, Անդրեյ Սուվորովի մասին է, որը Նավալնիին դատապարտել է 19 տարվա ազատազրկման հատուկ ռեժիմի գաղութում, և Կիրիլ Նիկիֆորովին, որը մերժել է թիվ 6 գաղութի դեմ նրա հայցը՝ պատժախցում 12 օր մնալու համար։
