07.10.2026 | 13:16
Վարդաձորի դպրոցում միջադեպը կուսումնասիրեն, ուսուցչուհուն կարող են զրկել մանկավարժական գործունեության իրավունքից
Պուտինը՝ Բելգորոդի շրջանի հրետակոծության մասին. «Կարող ենք նույն կերպ պատասխանել»
Քաղաքականություն
20.03.2024 | 17:27
ՌԴ նախագահ Վլադիմիր Պուտինը մեկնաբանել է վերջին օրերին Ուկրաինայից Բելգորոդի շրջանի ինտենսիվ հրթիռակոծման մասին լուրերը՝ ասելով, որ իշխանությունները մտադիր են ապահովել սահմանամերձ շրջանների անվտանգությունը։ Նա, սակայն, չի հստակեցրել, թե կոնկրետ ինչպես է մտադիր դա անել, գրում է BBC-ի ռուսական ծառայությունը։
«Իհարկե, մենք կարող ենք նույն կերպ պատասխանել: Ե՛վ քաղաքացիական ենթակառուցվածքների, և՛ նման այլ օբյեկտների դեմ, որոնց վրա թշնամին հարձակվում է: Մենք ունենք մեր սեփական տեսակետներն այս հարցում և մեր սեփական ծրագրերը։ Մենք կհետևենք մեր նախանշած ծրագրին»,- ասել է Պուտինը։
Նկատենք, որ չնայած Պուտինն ասում է, որ ռուսական զորքերը «կարող են» պատասխան հարված հասցնել Ուկրաինայի քաղաքացիական ենթակառուցվածքին՝ նման հարվածների մասին հաղորդվում է գրեթե ամեն օր՝ այն պահից, երբ սկսվել է Ռուսաստանի լայնամասշտաբ ներխուժումն Ուկրաինա:
Բելգորոդի մերձակայքում գտնվող Խարկովը մշտապես գնդակոծվում է, քաղաքի ամբողջական թաղամասեր ոչնչացվել են ռուսական հրետանու և հրթիռային կրակի հետևանքով։ Ուկրաինայի նախագահ Վլադիմիր Զելենսկին ավելի վաղ հայտնել էր, որ միայն մարտի ընթացքում շուրջ 200 կառավարվող ռումբ է արձակվել Սումիի շրջանի ուղղությամբ։
Ավելի վաղ Պուտինը խոսել էր Ուկրաինայի տարածքում «սանիտարական գոտու» ստեղծման հնարավորության մասին՝ Ռուսաստանի վրա հարձակումների հնարավորությունը կանխելու համար։
