Երևանում օդի աղտոտվածությունը 5-7 անգամ գերազանցում է համաշխարհային առողջապահական չափանիշները․ IQAir

2023 թվականին աշխարհում միայն տասը երկրում և տարածքում է օդն աղտոտող PM2.5 մասնիկների քանակությունը համապատասխանում համաշխարհային առողջապահական չափանիշներին: Նման տվյալներ են բերված շվեյցարական IQAir հետազոտական կազմակերպության օդի որակի մասին տարեկան զեկույցում։

Գնահատվել է օդի աղտոտվածության մակարդակը 134 երկրներում և 7812 քաղաքներում։

Զեկույցում նշվում է, որ Երևանում օդի աղտոտվածությունը 5-7 անգամ գերազանցում է թույլատրելի նորման ու PM2.5 մասնիկների թիվը կազմում է 26,4: Տարածաշրջանում Երևանն օդի աղտոտվածության մակարդակով առաջին հորիզոնականում է։ Անկարայի օդի աղտոտվածության ցուցանիշը 19,8 է, Բաքվինը՝ 18,8, Թբիլիսիինը՝ 15.5 է։

IQAir-ը նշում է, որ օդի աղտոտվածությունը պատասխանատու է աշխարհում յուրաքանչյուր ինը մահվան դեպքի համար և հանդիսանում է մարդու առողջության համար ամենակարևոր բնապահպանական սպառնալիքը: Հիվանդությունների շարքում, որոնք հրահրվում են PM2.5-ի բարձր մակարդակով (մթնոլորտային աղտոտիչներ՝ մասնիկների տրամագծով մինչև 2,5 մկմ), ասթման է, քաղցկեղը, ինսուլտը և թոքերի հիվանդությունները։

IQAir-ի գնահատմամբ՝ 2023 թվականին ամենամաքուր օդը եղել է Ֆրանսիական Պոլինեզիայում։ Օդի մաքրությունը չափանիշներին համապատասխանում է նաև Մավրիկիոսում, Իսլանդիայում, Գրենադայում, Բերմուդայում, Նոր Զելանդիայում, Ավստրալիայում, Պուերտո Ռիկոյում, Էստոնիայում և Ֆինլանդիայում:

Ամենակեղտոտ օդն ունեցող երկիրը, ըստ IQAir-ի, Բանգլադեշն է, որտեղ PM2.5-ի մակարդակն ավելի քան տասն անգամ բարձր է անվտանգ մակարդակից։