Քաղաքականություն
19.03.2024 | 12:22
Ադրբեջանն ու ՆԱՏՕ-ն աշխատում են համագործակցության նոր շրջանակային փաստաթղթի համաձայնեցման շուրջ։ Այս մասին ադրբեջանական պետական «Ազերթաջ» լրատվական գործակալության հետ զրույցում հայտարարել է ՆԱՏՕ-ի գլխավոր քարտուղար Յենս Ստոլտենբերգը։
«Մենք աշխատում ենք ՆԱՏՕ-ի և Ադրբեջանի միջև համագործակցության նոր շրջանակային փաստաթղթի համաձայնեցման շուրջ։ Այս փաստաթուղթը հիմնված է լինելու փոխգործակցության խնդիրների վրա, և այստեղ հիմնական նպատակը համատեղ աշխատանքն է՝ Ադրբեջանի Զինված ուժերը ՆԱՏՕ-ի չափանիշներին հարմարացնելու ուղղությամբ, որպեսզի դրանք գործառնականորեն լիովին համատեղելի լինեն ՆԱՏՕ-ի ուժերի հետ»,- ասել է Ստոլտենբերգը։
Նա նշել է, որ Ադրբեջանը և ՆԱՏՕ-ն մեծ նշանակություն են տալիս ռազմական կրթության հարցերին, ինչը կնպաստի կողմերի միջև փոխգործակցության զարգացմանը։
«Միևնույն ժամանակ, մենք դիտարկում ենք այլ ոլորտներ, որտեղ կարող ենք զարգացնել մեր համագործակցությունն ապագայում: Այս ամենը կմերձեցնի Ադրբեջանի և ՆԱՏՕ-ի ուժերը, և ես կարծում եմ, որ դա ձեռնտու կլինի երկու կողմերին»,- ընդգծել է ՆԱՏՕ-ի գլխավոր քարտուղարը։
Նա հավելել է, որ ՆԱՏՕ-ն, ընդհանուր առմամբ, շահագրգռված է ապագայում էլ Հարավային Կովկասի երկրների հետ համագործակցության զարգացմամբ։
«Մենք ունենք մի քանի կարևոր գործընկերներ Կովկասում, ուստի այս տարածաշրջանը շատ կարևոր է մեզ համար։ ՆԱՏՕ-ն և Եվրամիությունը շահագրգռված են Հարավային Կովկասի երկրների հետ հարաբերությունների հետագա զարգացմամբ։ Իհարկե, Վրաստանն այս հարցում այլ դիրքում է, ՆԱՏՕ-ին անդամակցելու հայտ է ներկայացրել։ ՆԱՏՕ-ն բազմիցս հայտարարել է, որ դա տեղի կունենա»,- նշել է Ստոլտեբերգը։
Հավելենք, որ Յենս Ստոլտենբերգը Բաքվում բանակցություններ է անցկացրել նախագահ Իլհամ Ալիևի, ԱԳՆ և ՊՆ ղեկավարներ Ջեյհուն Բայրամովի և Զաքիր Հասանովի հետ։
Վրաստան կատարած այցից հետո այսօր նա ժամանել է Հայաստան։
