13.12.2025 | 15:42
Ռոնալդուն կնկարահանվի «Ֆորսաժ» ֆիլմում
Ալիևը Ստեփանակերտի Վերածննդի հրապարակն անվանափոխել է «Հաղթանակի» հրապարակի և կրկին սպառնալիքներ հնչեցրել
Քաղաքականություն
18.03.2024 | 18:35
Ադրբեջանի նախագահ Իլհամ Ալիևը հայաթափված Ստեփանակերտից շնորհավորել է ադրբեջանցիների Նովրուզը, միաժամանակ, հերթական հայատյաց հայտարարությունները հնչեցնելով։ Ալիևը հայտարարել է, որ Ստեփանակերտի Վերածննդի հրապարակն անվանափոխել է «Հաղթանակի» հրապարակի։
«Երկար տարիներ այս հրապարակն ու այս շենքը անջատողականների որջն էին։ Հենց այս հրապարակում ստոր ծրագրեր մշակվեցին մեր ժողովրդի դեմ։ Հենց այս շենքում հրամաններ են տրվել իրականացնել «Խոջալուի ցեղասպանությունը»։ Եվ այսօր մենք կանգնած ենք այս հրապարակում։ Ես ուզում եմ իմ սիրելի ժողովրդին ասել, որ այս հրապարակն անվանել եմ «Հաղթանակի» հրապարակ»,- ասել է նա։
Ադրբեջանի նախագահը նաև հայտարարել է, թե «Ղարաբաղյան երկրորդ պատերազմի արդյունքները դաս չեն դարձել Հայաստանի համար»։
«Եթե դաս լինեին, հակաահաբեկչական գործողություն իրականացնելու կարիք չէր լինի»,- ասել է Ալիևը՝ նկատի ունենալով Արցախի դեմ ռազմական ագրեսիան և էթնիկ զտումը։
Բացի այդ, Ադրբեջանի նախագահը հայտարարել է, թե բոլորը պետք է հաշվի նստեն իրենց հետ։
«Մենք բոլորս հպարտ ենք, որ ինքներս վերականգնեցինք արդարությունը, ցույց տվեցինք մեր ուժը։ Այսուհետ բոլորը պետք է հաշվի նստեն մեզ հետ, այլապես կզղջան»,- ասել է Ալիևը՝ չնշելով, թե ում նկատի ունի։
