12.08.2026 | 00:10
«Արարատ-Արմենիան» դուրս մնաց Չեմպիոնների լիգայից. ՏԵՍԱՆՅՈՒԹ
Արտասահմանում քվեարկել է շուրջ 373,000 ռուսաստանցի․ ՌԴ ԱԳՆ
Քաղաքականություն
18.03.2024 | 13:19
Ռուսաստանի նախագահական ընտրություններում, որոնք տեղի են ունեցել մարտի 15-ից 17-ը, արտասահմանում քվեարկել է 372,779 մարդ։ Նախնական այս տվյալները հայտնել է ՌԴ ԱԳՆ պաշտոնական ներկայացուցիչ Մարիա Զախարովան։ Նրա խոսքով՝ այս թվերն «աննախադեպ են», գրել է DW-ի ռուսական ծառայությունը։
Զախարովայի խոսքով՝ ընտրական ոգևորությունը «խթանվել է նաև նրանով, որ «ոչ բարեկամական» երկրներում փակվել են Ռուսաստանի մի շարք գլխավոր հյուպատոսություններ։ Որպես օրինակ՝ ՌԴ ԱԳՆ ներկայացուցիչը բերել է Գերմանիան, որտեղ «մարդիկ կանգնած էին բառացիորեն մինչև գիշեր»:
Բեռլինում DW-ի թղթակիցը հայտնել է, որ Գերմանիայի մայրաքաղաքում Ռուսաստանի դեսպանատան դիմաց, ընտրատեղամասի պաշտոնական փակումից հետո, իսկապես փողոցում դեռևս մի քանի հարյուր քաղաքացիներ են եղել, ովքեր չեն հասցրել քվեարկել։ Նրանցից շատերը, սակայն, եկել էին այնտեղ՝ աջակցելու «Կեսօրն ընդդեմ Պուտինի» ակցիային։
Այն բանից հետո, երբ ժամը 20։00-ից ՌԴ դեսպանատան մուտքը փակվել է, մարդիկ սկսել են վանկարկել՝ «Ամո՛թ», «Ռուսաստանն առանց Պուտինի» և «Ո՞ւր է իմ ձայնը»։
Բոննում, որտեղ գտնվում է Ռուսաստանի հյուպատոսությունը, քվեարկության ավարտից առաջ այլևս հերթ չի գոյացել։ Տեղական ժամանակով ժամը 19։40-ին հյուպատոսության դիմաց չեն երևացել քվեարկել ցանկացողներ, որոնք չեն հասցրել դա անել։
