12.08.2026 | 00:10
«Արարատ-Արմենիան» դուրս մնաց Չեմպիոնների լիգայից. ՏԵՍԱՆՅՈՒԹ
Ռուսական կողմը հայտնում է Բելգորոդի կրկնակի գնդակոծության մասին
Քաղաքականություն
14.03.2024 | 15:55
ՌԴ Բելգորոդ մարզի նահանգապետ Վյաչեսլավ Գլադկովն իր Telegram-ալիքում հայտնել է, որ Բելգորոդի գնդակոծության հետևանքով տուժածների թիվն ավելացել է, փոխանցում է BBC-ի ռուսական ծառայությունը։
Նրա խոսքով՝ տուժածների թվում կա 4 կին և 2 տղամարդ։ Նրանցից երկուսը գտնվում են ծանր վիճակում, պարզաբանել է նահանգապետը։
Բացի այդ, ըստ Գլադկովի, Բելգորոդում գնդակոծության հետևանքով տուժել է 11 մասնավոր տնային տնտեսություն, 2 բնակարան բազմաբնակարան շենքերում, հյուրանոց և մարզասրահ, ինչպես նաև 53 ավտոմեքենա։
Գլադկովը պնդում է, որ հինգշաբթի կեսօրին հակաօդային պաշտպանության համակարգը «10 օդային թիրախ» է խոցել շրջանի մայրաքաղաքում, փոխանցում է լրատվականը։
Միևնույն ժամանակ, Գլադկովը նշել է, որ «պայթյունի հետևանքով» կնոջ վարած մեքենան կողաշրջվել է։ Ստացած վնասվածքներից նա մահացել է։ Նահանգապետը, սակայն, չի հստակեցրել, թե ինչու է տեղի ունեցել պայթյունը։
Հիշեցնենք՝ այսօր ՌԴ Պաշտպանության նախարարությունը հայտնել էր, որ մարտի 14-ի գիշերը ՀՕՊ համակարգերը Բելգորոդի և Կուրսկի շրջաններում ոչնչացրել և որսացել են 14 անօդաչու թռչող սարք։ Ուկրաինական կողմն իր հերթին հայտնել էր, որ խոցել է ՌԴ կողմից գործարկված 36 անօդաչու թռչող սարքերից 22-ը։
