07.10.2026 | 15:01
«Էրեբունի-Երևան 2808»-ի միջոցառումներով պայմանավորված մի շարք փողոցներ կփակվեն
Իսրայելը մտադիր է Ռաֆահում ապաստանած 1,4 միլիոն տեղահանված պաղեստինցիներին տեղափոխել «մարդասիրական անկլավներ»
Քաղաքականություն
14.03.2024 | 16:18
Իսրայելը մտադիր է 1,4 միլիոն տեղահանված պաղեստինցիներին Գազայի հարավային Ռաֆահ քաղաքից տեղափոխել «մարդասիրական անկլավներ»՝ նախքան այնտեղ ծրագրված ռազմական հարձակումը։ CNN-ի փոխանցմամբ՝ այս մասին լրագրողներին ասել է Իսրայելի պաշտպանության բանակի խոսնակ Դանիել Հագարին։
Նա ասել է, որ Ռաֆահի վրա հարձակումը «մի բան է, որն անհրաժեշտ է անել», բայց նաև ռազմական գործողությունների ժամկետները կախված են այն պայմաններից, որոնք թույլ կտան դա անել:
Գազայի բնակչության կեսից ավելին այժմ ապաստանել է Ռաֆահում, որը սահմանակից է Եգիպտոսին։
«Իսկ որո՞նք են այդ պայմանները։ Մենք պետք է համոզվենք, որ 1,4 միլիոն մարդ կտեղափոխվի մարդասիրական անկլավ, որը կստեղվի միջազգային հանրության կողմից։ Նրանք նրանց կտրամադրեն ժամանակավոր տներ, սնունդ, ջուր, դաշտային հոսպիտալ»,- ասել է նա։
Իսրայելի վարչապետ Բենիամին Նեթանյահուն հայտարարել է, որ անհրաժեշտ է առաջխաղացում դեպի Ռաֆահ՝ ոչնչացնելու ՀԱՄԱՍ-ի մնացած ռազմական գումարտակները։ Հագարին հրաժարվել է նշել Իսրայելի պաշտպանության բանակի ցանկացած գործողության ժամկետները քաղաքում, որտեղ մարդիկ ապրում են սննդի, ջրի, դեղորայքի և ապաստանի խիստ պակասով:
«Մենք ուժեղացնում ենք մեր պատրաստվածությունը։ Ես չեմ ցանկանում նշել որևէ ժամկետ։ Դա կլինի Իսրայելի համար լավագույն ժամանակում»,- ասել է Հագարին։
Ավելի վաղ իսրայելցի պաշտոնյաները CNN-ին հայտնել էին, որ ներխուժումը մոտ ժամանակաշրջանում չի լինի, և որ նախարարների կաբինետը դեռ չի հաստատել ռազմական ծրագրերը:
