07.10.2026 | 15:00
Հայտարարվել են քիմիայի ոլորտում Նոբելյան մրցանակի դափնեկիրները
ԱՄՆ-ը գաղտնի բանակցություններ է վարել Իրանի հետ. FT
Քաղաքականություն
14.03.2024 | 17:09
ԱՄՆ-ը գաղտնի բանակցություններ է վարել Իրանի հետ և փորձել է համոզել Թեհրանին օգտագործել իր ազդեցությունը Եմենի հութիների շարժման վրա՝ դադարեցնելու Կարմիր ծովում նավերի վրա հարձակումները։ Այս մասին գրում է Financial Times-ը։
Նշվում է, որ հունվարին Օմանում տեղի են ունեցել անուղղակի բանակցություններ, որոնք ԱՄՆ-ի և Իրանի միջև առաջինն են եղել վերջին 10 ամսվա ընթացքում։ Ամերիկյան կողմը ներկայացրել են Սպիտակ տան Մերձավոր Արևելքի հարցերով խորհրդական Բրեթ Մաքգուրքը և Իրանում ԱՄՆ դեսպան Աբրամ Փեյլին։ Իրանը ներկայացրել է փոխարտգործնախարար Ալի Բաղերի Քանին։
Երկու պատվիրակությունների անդամները շփվել են միջնորդների միջոցով, որոնք Օմանի ներկայացուցիչներ էին։ Խորհրդակցությունների երկրորդ փուլը պետք է տեղի ունենար փետրվարին, բայց այն հետաձգվեց։
ԱՄՆ-ն Իրանին մեղադրում է հութիներին զենք մատակարարելու մեջ։ Ամերիկացի պաշտոնյաների խոսքով՝ հենց Թեհրանի ճնշումն է ապահովելու հութիների կողմից իրականացվող հարձակումների դադարեցումը։
Իրանը ձգտում է խուսափել ԱՄՆ-ի կամ Իսրայելի հետ ուղիղ հակամարտությունից և թույլ չտալ լայնածավալ տարածաշրջանային պատերազմ։ Սակայն Եմենի հութիները շարունակում են հարձակումները Կարմիր ծովում գտնվող նավերի վրա։
2023 թվականի հոկտեմբերից ի վեր խմբավորումը 99 հարձակում է իրականացրել Կարմիր ծովում և մոտակա ջրերում՝ ազդելով 15 առևտրային նավերի, այդ թվում՝ չորս ամերիկյան նավի վրա:
