«Հակաադրբեջանական զրպարտչական արշավի մաս»․Ադրբեջանի ԱԳՆ-ն դժգոհում է Եվրախորհրդարանի բանաձևից

Ադրբեջանի ԱԳՆ-ն արձագանքել է Եվրախորհրդարանի կողմից «ԵՄ-ի և Հայաստանի միջև կապերի սերտեցման, Հայաստանի ու Ադրբեջանի միջև խաղաղության համաձայնագրի անհրաժեշտության վերաբերյալ» բանաձևի ընդունմանը։

Ադրբեջանական լրատվամիջոցների փոխանցմամբ՝ ԱԳՆ խոսնակ Այխան Հաջիզադեն հայտարարել է, թե «բանաձևը ոչ միայն անհիմն է և կողմնակալ, այլև Ադրբեջանի նկատմամբ հերթական երկակի ստանդարտների վառ օրինակ է»։

«Հայաստանի և հայկական լոբբիի ազդեցության տակ գտնվող մի շարք շրջանակների կողմից Եվրախորհրդարանում առաջ մղվող այս բանաձևը, չնայած այն փաստին, որ ներկայացվել է որպես «խաղաղության խթանում» և, իբր, նվիրված է Եվրամիության և Հայաստանի հարաբերություններին, հակադրբեջանական զրպարտչական արշավի մաս է կազմում, որում բոլոր փաստերը կեղծված են»,- ասվում է հայտարարության մեջ։

Ըստ Հաջիզադեի՝ Ադրբեջանի և Հայաստանի միջև հարաբերությունների կարգավորման գործընթացին միջամտելու փոխարեն՝ Եվրախորհրդարանը կդառնա ավելի օգտակար հաստատություն, եթե զբաղվի Եվրոպայի վրա ազդող ավելի լուրջ խնդիրներով՝ «ներառյալ ռասայական խտրականությունը, իսլամատյացությունը, այլատյացությունը, ծայրահեղականությունը և միգրանտների նկատմամբ անմարդկային վարքագիծը»։

«Եվս մեկ անգամ Եվրախորհրդարանի անդամների ուշադրությանն ենք հրավիրում, որ հայտարարված արժեքների հետ ոչ մի կապ չունեցող նման բանաձևերն ամբողջովին զրոյացնում են Եվրախորհրդարանի՝ որպես ինստիտուտի դերը»,- հայտարարել է նա։

Հիշեցնենք, որ բանաձևն ընդունվել է 504 կողմ, 4 դեմ, 32 ձեռնպահ ձայներով։